Beisei pha lo Germany

Germany-in kum 2018 chhunga a vawi khat nan hnehna an chang a, Zirtawpni zan hian Saudi Arabia chu 2-1 in a hneh. Saudi hi FIFA World Cup khel tur zinga ranking chhe ber dawttu an nih avangin Die Mannschaft tan inchhuanna tur a awm lo.

Bayer Leverkusen khelmual Bay-Arena-ah Germany-in Timo Werner hmangin minute riatna lekah hma an hruai a, minute 43-naah Omar Hawsawi-a'n an lamah a tihluh bawk avangin world champion dinhmun a ṭha.

Second half-ah Germany zawk an talbuai a, Al-Jassam-a'n Sami Khedira lakah penalty a hlawh chhuak. Saudi chhuanvawr Mohammad Al-Sahlawi pet chu second half-a Manuel Neuer thlaktu Marc-Andre ter Stegen-a'n dang mah se Al-Jassam-a'n goal-ah a chantir tho.

Siphurh sut nan minute ruk a la awm a, injury time-ah Mats Hummels-a'n box chhungah Al-Sahlawi a pawt thlu a, referee-in penalty a pe nawn lo a, Germany an him hlauh.

Die Mannschaft hian kuminah match li an khel tawh a, Saudi hi an vawi khat chakna niin hemi hmaa an hmachhawn te chu Spain (1-1), Brazil (0-1) leh Austria (1-2) te an ni.

Germany boss Joachim Low chuan, "Hma kan sawn zel ang a, inelna ṭan hun chuan kan inpeih tawh ang. Bul kan ṭan ṭha a, a tawpah erawh chak turin vanneihna kan mamawh a ni," tiin June 17-a Mexico an hmachhawn hmaa insiamṭhat theih a inbeisei.

Manchester City midfielder Ilkay Gundogan erawh May thlaa Turkey president Tayyip Erdogan an hmuh avang leh 'ka president' tia a sawi avangin a chungah German mipui an lawm lo. Turkish nupa kara piang Gundogan-a'n ball a chan apiang an au el a, inkhelh banah Joachim Low-a'n chhanin, "National player an boo hian tumah a pui lo. Mipui lawm lohna tur chuan a lo che ngei a, mah se Germany tana khelh a ngaih hlut thu a sawi tawh a, kan zah sak a ṭul a ni," tiin a sawi.