Tunisia lakah Spain an chak hram

World champion nih tum Spain-in Tunisia laka hnehna chang turin minute 84 an nghah thlen a ngai a, World Cup inpuahchah nana an match hnuhnung berah 1-0 in hnehna an chang hram. He inkhela goal awm­chhun hi Iago Aspas khung a ni.

World Cup khel tura rinkai zingah Serbia tel lo mah se group stage-a tawp mai tur erawh an ni bik lo tih an pholang a, 5-1 ngawtin Bolivia an sawp - New­castle United forward Alek­san­dar Mitrovic chuan hattrick a siam.

Beisei phak lo Spain
Tunisia lakah Spain-in bei­sei angin an khel lo a, minute 60-naa luhtir Diego Costa-a'n khelmuala hun a hman aṭanga minute nga hnuah shot a nei tih loh chu goal zawnah pet a nei lo!

He inkhela rin loh taka chance hlauhawm nei hmasa zawk chu Tunisia hi an ni a, Naim Sliti chuan yard ruk vel leka hla aṭangin a volley over! Spain thinphu a rang hman a, goal an chhuah loh avangin an vannei.

Spain-in nawr nat tum ṭhin mah se tlarhnung lamah Tunisia an inrem khat tlat a, counter attack hmanga Spain an nawr let ṭhin chu a hlauhawm thei hle. Mahse, Spain coach Julen Lopetegui-a'n minute 60-naah substitution fuh takin a siam.

Costa luhtir a ni a, Atletico Madrid striker luh hnuah hian Spain an hlauhawm sawt. Hun tawp nan minute ruk chiah a awm tawh tihah Costa hian Aspas tan a siamsak a, Liverpool striker hlui hian chakna goal ni turin a khung.

Thiam theihnghilh Iniesta?
Tunisia nena inkhelah hian Andres Iniesta chu minute 90 chhung khelh tluantir a ni a, Barcelona midfielder hlui hian tun hma a pha tawh lo tih a khelh danah a lang - World Cup-ah eng tak ang ang maw?

Iniesta hian level sang taka khel turin theihna a nei tawh lo nia a inhriat avangin Barcelona a chhuahsan niin a insawi a, Japanese club Vissel Kobe a pan - Tunisia laka a khelh dan en chuan kum 34 mi midfielder hian thudik a sawi.

Tunisia lakah Iniesta hian ball vawi 23 ngawt a hloh a, team pahnih player zinga ball hloh ngun ber a ni! Kum 2010 World Cup-a Spain champion puitu hi 2010 anga ropuia a inlan tawh lo a nih pawhin a mak lo ang.

Spain hi Group B-ah Por­tugal, Spain, Morocco leh Iran te nen an awmho a, Tunisia nen an inhnehtawk avang hian match 20 chhung chu tlawm hmel an hmu ta lo.

Serbia tan Mitrovic
World Cup Group E-a awm Serbia-in tih mai mai an tum dawn lo tih Bolivia lakah an lantir a, 5-1 ngawtin an sawp. Serbia hi Brazil, Switzerland leh Costa Rica te nen an awmho a, an awmpui tur team tan an result hi ngaihhthlak nuam a ni lo ang.

Serbia tan Newcastle United forward Aleksandar Mitrovic chuan minute lina aṭangin goal a khung ṭan a, minute 42-na a thlen meuh chuan hattrick a siam fel der tawh - kum 23 mi striker hian ram tan match 37-ah goal 16 a khung tawh.

February khan Magpies aṭangin Fulham chu loan-in a zawm a, Championship club tan hian league match 17-ah goal 12 a khung. World Cup-ah en bik a sual lo ang.

Mitrovic bakah hian Torino forward Adem Ljajic chuan Magpies forward hattrick siam karah goal a khung ve bawk a, Chelsea full-back hlui Branislav Ivanovic chuan ṭha zetin a volley goal ve bawk.