Lionel Messi hmachhawn tur an hraw
World Cup Group D-ah Argentina, Iceland, Croatia leh Nigeria te an awmkhawm a, ram palite hi last 16 thleng thei tura rinkai ni phak an ni. Lionel Messi awmna Argentina erawh an champion lo a nih chuan an lawm a kim phak lo ang.
Messi telna
Barcelona tan champion theihna zawng zawngah Messi a champion kim tawh a, mimal chawimawina dawn theih sang ang chu a dawng kim tawh bawk. Mahse, Messi hian an ram tan nomawi lian tham a la chawi lo. Kum 30 a tlin tawh vangin Messi tan a vanglaia World Cup hnuhnung a ni thei tawh, champion a duhna a sang zual hle dawn a ni.
Inter Milan captain Mauro Icardi koh ngai lo khawpin Argentina hian hmatawng an nei ṭha a, ram dang tlarhnung chu an su hawng thei ngei ang. Chutihrualin coach Jorge Sampaoli tan tlarhnung remphui thiam chu hna pawimawh a ni dawn, hliam vangin an keeper Sergio Romero chu an chhawr thei dawn lo.
Rinkai lo!
Nigeria hi group stage paltlang tura rinkai ber an ni lo. Mahse, he ramah hian Premier League player Alex Iwobi, Kelechi Iheanacho, Wilfred Ndidi leh Victor Moses te bakah Chelsea midfielder hlui Jon Obi Mikel a awm miau a, dah hniam theih an ni lo.
World Cup vawi nga an khelh tawhah 1994, 1998 leh 2014 te khan a thiam 16 zingah an tel phak a, vawi hnih chiah group stage an paltlang lo a ni. An hmatawng an khel ṭha rual a nih chuan Argentina tlarhnung tan pawha buaipuitham tak tur an ni.
Ram te ber
Russia World Cup khel tur zingah Iceland hi ram te ber an ni. An ram hi 39,682 sq m chauha zau a ni a, 1 March 2018-a record dan chuan mipui 350,710 chauh an cheng. Aizawl district chhunga cheng mihring zat aiin an tlem zawk tihna a ni!
Iceland tan World Cup hmasa ber a ni dawn a, 2016 Euro-ah khan khawvel barakhaihin group stage an paltlang. Last 16-ah England 2-1 in an hneh hial a, quarterfinal-ah erawh a thlengtu France 5-2 in an ngam lo. Tun ṭumah hian beiseina an nei sang ve leh khawp ang.
Modric awmna
World Cup khel tur ram 32 squad thlir kual ila, Croatia aia midfield nei ṭha an awm bik kher lo mai thei. 1998 World Cup pathumna hian Luka Modric, Ivan Rakitic leh Ivan Perisic te an remkhawm thei dawn.
Real Madrid thiampuipa Modric hi qualifier lamah pawh an innghahna a ni a, Russia-ah pawh an rinrawl a ni leh ang. Juventus striker Mario Mandzukic-a'n duhthusama ṭhain season hmang lo mah se Nikola Kalinic (AC Milan) leh Andrej Kramaric (Hoffenheim) te pawh an rintlak viau tura ngaih a ni.