Blue Tigers hahum ri a ring

AFC Asian Cup 2019 khel tura inbuatsaih India-in UAE-ah a tikimtu ringawt nih an tum lo tih an pholang a, Asian Cup inbuatsaih nana huaihawt Hero Intercontinental Cup-ah an champion.

Pathianni zan khan Mumbai Football Arena-ah India leh Kenya ten Intercontinental Cup champion nih an inchuh a, Blue Tigers hian 2-0 in hnehna an chang–Sunil Chhetri khung ve ve a ni.

Mizo tlangval Jeje Lalpek-hlua'n dan pangngai angin inkhel bul a ṭan a, Laldanmawia Ralte leh Lalruatthara te hun tawp hnaih lamah luhtir an ni bawk a, Danmawia tan India tana a inlan hmasak ber a ni nghal.

Chhetri bawk chu...
Mumbai Football Arena-ah India champion lai hmuh duhin stadium khat tlat mipui an pungkhawm a, final ticket hi Ningani khan hralh zawh a ni daih tawh–boruak a sang.

Minute riatna lekah Chhetri kan hmu nghal a, India captain hian freekick a hlawh chhuak. Kum 20 mi Anirudh Thapa-a'n goal-ah pet ngawt loin fing takin Chhetri a pe a, India captain tan goal-a chantir turin harsatna a awm lo.

Minute 24-naah Jeje, Thapa leh Chhetri ten box chhungah ball an inpe kual a, mahse hlauhawm a thlen hmain defender Michael Kibwage chuan Harambee Stars (Kenya sawina) a chhanhim hman.

An dang thei lo...
Minute 29-na a ni a, Chhetri bawk kan hmu nawn. India defender Anas Edathodika chuan Kenya defense khumin ball a pet lut a, Sunil Chhetri chuan a awma la thlain mawi zetin a pet lut.

Chawlhlawk hman a nih hmain India-in goal thum khung theihna remchang an nei a, mahse freekick pettu Chhetri-a'n bar chungah a pet.

Goal dang lut loin chawlhlawk hman a ni a, 2-0 a hmahruaitu India an khel ṭha a, league round-a 3-0 a an lo hneh tawh team lakah 'tihpalh' thilthu a hnehna chang an ni lo tih an pholang.

Fak phu Gurpreet
Chawlhlawk hman zawh a nih hnuah Kenya an hlauhawm a, India goalkeeper Gurpreet Singh Sandhu chu hmuh turin a awm nghal–Kenya striker Ovella Ochieng shot chu ṭha zetin a dang.

Hun tawp nan minute 15 a la awm tihin Kenya hian freekick an hlawh chhuak bawk a, Ovella Ochieng chuan ṭha zetin pet mah se Gurpreet-a thiam thil 'show' na chance mai a ni.

Minute 61-naah Jeje Lalpekhlua lakchhuah a ni a, hun pek belhah Lalruatthara leh Laldanmawia te tlan luhtir an ni thung. A tawp thlengin India an ṭang tlang a, 2-0 in an chak a, an champion.