Chhetri leh Messi

Sunil Chhetri-a'n match li an khelhah goal riat a khung a, ram tan match 102 a khelhah goal 64 ngawt a khung ta. Chhetri-a'n Kenya lama goal hnih a khung chiah khan ram tana goal khung tam lamah Lionel Messi a tluk chiah.

Barcelona forward hian Argentina tan match 124 a inlanah goal 64 a khung a, Portugal captain Cristiano Ronaldo chuan match 150 a inlanah goal 81 a khung thung.

Football la khel mek zingah Ronaldo hi ram tana goal khung hnem ber a ni a, Chhetri hian Messi aia match a khelh tlem zawk avangin Argentine legend chungah a awm tihna a ni.

India captain hian social media kaltlangin fan-te chu India inkhel en turin a sawm a, he video rilru khawih tak avang hian thawklehkhatah Indian football-in ngaihven a hlawh hluai.

Tournament khelh a nih dawn tirha media ngaihven hlawh lo inelna hi media lian zawng zawngin a chanchin an ngaihven tawh a, match hmasa bera India leh Chinese Taipei inkhel entu kha 2000 chuang awrh an nih laiin a hnua match thum an khelh lehah chuan ticket hralh zawh vek an ni.