Mizote leh Intercontinental Cup
#Jeje50: India-in match li an khel a, Mizo tlangval Jeje Lalpekhlua a inlan kim vek. Chennaiyin FC striker hian New Zealand an hmachhawn ṭumin ram tana a match 50-na a khel a, a bik takin Mizo football a hriatreng tawh tur a hnutchhiah.
Hnahthial tlangval hian he inelna bikah hian goal khat a khung a, assist vawi hnih a nei a, Sunil Chhetri nena an inkawp fuhna chu fak rawn a ni. Jeje hian ram tan goal 22 a khung tawh a, assist vawi 15 a nei bawk.
Jeje chuan, "International match kan khelh tam loh avangin India tana match 50 khelh hi thil harsa tak a ni a, he thil harsa tak hi ka puitlin theih avangin ka lawm takzet a ni. Tun inelna hi chu Asian Cup atana inbuatsaihna chauh a la ni a, hmabak tam tak kan la nei," tiin Vanglaini a hrilh.
Beiseiawm Jerry: Player naupangte nichungin Jerry Lalrinzuala'n ISL-a a season hmasa ber 2016-ah a hming a chher nghal a, India rama defender langsar pawl a ni der tawh. Bethlehem rawlthar hi New Zealand an ngam loh
ṭuma minute 87-naa luhtir a nih bak Intercontinental Cup-ah inlantir a ni lo. Jerry hian ram tan match nga a khel tawh a, a kum zat ngaihtuahin a tawn chin a sang hle. Asian Cup-a rinrawl ni tur erawhin season duhawm lehzual a hman a ṭul ang.
Hmunhmelṭha tlangval: Chinese Taipei an hneh ṭumin minute 82-naah Lalruatthara luhtir a ni a, final-ah injury time-ah luhtir a ni leh bawk. MPL aṭanga inzir chhuak defender hian Intercontinental Cup-ah a theihna tak tak pholang turin minute a nei tam tawk lo. Ruatthara hian Asian Cup qualifier-ah Kyrgyzstan hmachhawnin ram tana a match hmasa ber a lo khel tawh a, minute 90 hun ṭha a neihah a khel ṭha tawk lo. ISL Emerging Player of the League ni lai hi club level-ah a tla chhe thut a nih loh chuan India squad-ah hmun a chan chhunzawm zel rin a ni a, ram tana match thum a khelh tawh tipung tur erawhin tun aia a ṭan lehzual a ngai dawn a ni.
Sialhawk Express: India squad-ah R. Laldanmawia telh a ni a, final-a luhtir a nih khan Sialhawk Express tan ram tana a match hmasa ber a ni. Ram tana khel phak ni turin inelna a nasa a, Mizoram Premier League chhul chhuak forward tan Asian Cup 2019 squad-a tel phak turin club football-ah chet ṭhat chhunzawm a ṭul ang.