Messi a dan theih loh -Rakitic

Croatia midfielder Ivan Rakitic chuan World Cup group stage-a an hmachhawn tur Argentina captain Lionel Messi chu player mal tana dan theih a nih loh thu a sawi chhuak.

Group D-ah Argentina, Iceland, Croatia leh Nigeria te an awmkhawm a, Barcelona player pahnih Rakitic leh Messi te hi an inhmachhawn dawn a ni.

Catalan club tana season li chhung a khelhpui tawh Messi chungchang sawiin Rakitic chuan, "Hun rei tak chu kan lo thawkho tawh a, khelmual chhung leh training-na hmunah player dangtena kan tih theih loh thil mak a thlen tir fo, player ṭha bik chu ven theih an ni a, mahse Messi erawh ven theih a ni lo," tiin Messi a dah sang vet vet hle.

Croatia squad-ah hian Real Madrid duhlai Luka Modric leh Inter Milan star player Ivan Perisic te an awm a, Barcelona midfielder Rakitic hi goal nawr lam ai chuan a venhimna lam pui turin an chhawr a rinawm.

Kum 30 mi Rakitic chuan, "Javier Mascherano te nen kan inel dawn a ni a, a awlsam dawn lo hle. Kei chuan ram tan theihtawp ka chhuah dawn a, club lama kan ṭhiante pawh ni se ram aiawh kan nih dawn avangin chungnung zawk nih kan tum dawn a ni.

"Kan group hi en ila, khawmualpui hrang hrang South America, Africa leh Europe aṭangin kan awmkhawm. Ram tin hian player an nei ṭha em em a, a nihna takah chuan Argentina hi rinkai niin, ram dang pathum hi chu inel hle tura ngaih kan ni. Match zawng zawngah 100% kan pek a ngai dawn a, theihtawp kan chhuah bakah vanneihna kan mamawh tel ang," a ti.

Croatia hi tun dinhmunah world number 20 an ni mek a, World Cup-ah hian vawi nga an inlanna tur chiah a ni. An match hmasa ber atan June 17 hian Nigeria an hmachhawn dawn a ni.