Vawi 50 chak thei Vettel

Sebastian Vettel chuan car intlansiakna sang ber Formula 1-ah a vawi 50 nan hnehna a chang a, season kal lai a driver championship-ah Lewis Hamilton pelin pakhatna dinhmun a luah bawk.

Pathianni zana tlan zawh tak Canadian Grand Prix-ah Mercedes driver Vettel hian darkar khat, minute 28 leh 31.377secs chhunga thlengin hnehna a chang. German tlangval hnungah hian Mercedes car khalhtu Valtteri Bottas a thleng thung.

World champion vawi li ni tawh Vettel hian a vawi 54 nan pole position aṭangin intlansiak bul a ṭan a, buaina leh harsatna liantham a tawk lem lo. Tun season intlansiak vawi sarih an hmachhawn tawh aṭanga point 121 hmuin hmahruaitu a ni a, pahnihna Hamilton aiin point khatin a sang zawk. Intlansiak hnuhnung berah Hamilton hi pangana a nih phak chauh avangin championship lamah a dinhmun a hniam phah.

Kum 30 mi Vettel chuan, "Duhthusama ṭhain kan tlan a ni. Tun hnaiah Ferrari kan che ṭha tawk lo a, tun ṭumah chuan engkim a fuh vek a, min ṭantu a hmuna rawn kalte pawh an hlim em em em vek," tiin a sawi.

June 24 hian French Grand Prix tlan zui leh a ni dawn a, Circuit Paul Ricard-ah tun hnai kum 10 chhunga a vawi khat nan an intlansiak leh chiah dawn.