Brazil-in World Cup an cho!

Brazil-in World Cup khel turin an inpeih tawh tih an pholang a, Russia pan hmaa an match hnuhnung berah Austria chu 3-0 ngawtin an sawp.

Selecao tan Gabriel Jesus, Neymar leh Philippe Coutinho ten goal khat ṭheuh an khung a, Austria lamin a chhanletna tur an nei thei lo–Brazil coach tan a innghahna player ten goal an khung vek hi thil hmuh nuam tak a ni ngei ang.

Austria hian World Cup khel dawn lo mah se team ṭha leh tawh khirh tak an nih thuah inhnialna tur a awm lo a, tun thla tir khan world champion Germany chu 2-1 in an lo hneh tawh–Brazil lakah erawh team satliah ve mai an ni thung.

World Cup atan!
Brazli hi Russia-ah Group E-ah dah an ni a, Switzerland, Costa Rica leh Serbia te nen an inhmachhawn dawn–an group-a team awm dan thlirin Selecao lakah defensive game an khelh vek rin a ni a, hemi inbuatsaih lawk nan hian Brazil-in defensive game khel Austria an hmachhawn.

Tite-a'n an hmaa thil inchhawp hre ranin 4-3-3 formation a hmang a, midfield laiah defensive game ngawr ngawr khel ṭhin aiin attacking lam pui tel thei turin Coutinho leh Paulinho a dah dun a, Casemiro a awm bawk.

Brazil coach-in thutlukna a siam fuh avangin Austria tlarhnunga player panga intlar pawh Brazil-in an ṭhiat fo a, midfielder pathum bakah Willian, Jesus leh Neymar inkawp a hmuhnawm tel a, second half-a luhtir Roberto Firmino lah a khel ṭha em em bawk.

Beiseina
June 2017 hnuah Brazil-in tlawm hmel an hmu tawh miah lo a, hetih chhung hian match 10 zet an khel hman. Hei mai hi a ni lo, June 2016-a Tite-a'n Brazil a enkawl hnuah match 21 khelin match 16-ah goal chhuah loh an nei thei.

Brazil sulhnu thlirin World Cup khel turin an inpeih tawh tih hai rual a ni lo a, vawi nga ngawt world champion an nih tawh avangin knockout round an luh dawn leh dawn loh ai chuan 'an champion ang em?' tih hi zawhna tur zawk niin a lang bawk.

Neymar-a'n hliam vangin Paris Saint-Germain tan season tawp khar thei lo mah se a dam hnuah Brazil tan match hnih a khel leh tawh a, goal a khung ve ve bawk. Kum 26 mi striker hian ram tan goal 55 ngawt a khung tawh a, Brazil tana goal khung hnem lamah Pele (77) leh Ronaldo (62) chiah a tluk tawh lo!

Ka dil loh zawk...
World Cup group stage-a Brazil awmpui nghal ngawt hi eng team tan mah ṭawngṭai chhannaa puh phal chi a ni lo a, tlarhma bakah tlarhnung lama Thiago Silva, Danilo, Miranda leh Marcelo te ho la tlar thei team lakah beiseina neih san a harsa ang.

Group E aṭang hian Brazil hi last 16 lut tur chiangah dah pawh ni ta ila, hmun ruak pakhat a la awm dawn tihna a ni a, Switzerland, Costa Rica leh Serbia te hi team intum tawk tak veka ngaih tur an ni a, squad en pawhin an intluk tawk hle.

Switzerland hi Spain an inhnehtawkpui hnua 2-0 a Japan hneh thei an ni a, Brazil hmachhawn hmasa ber dawn mah se an zam lo ang. Swiss team-ah hian Arsenal defender thar Stephan Lichtsteiner leh midfielder Granit Xhaka, Stoke City rinrawl Xherdan Shaqiri leh Benfica forward Haris Seferovic te an awm a, an chhe lo.

Beisei nei Serbia
Serbia-in World Cup inbuatsaih nan 0-1 in Chile ngam lo zet mah se an match hnihnaah erawh 5-1 ngawtin Bolivia an sawp thung a, Aleksandar Mitrovic chuan hattrick a siam–Newcastle forward chet ṭhat leh ṭhat loh hian Serbia dinhmun tur a hril thui khawp ang. Nizan khan Belgium an inkhelhpui a, an result kan hre hman lo.

Eagles (Serbia sawina) hian tlarhnungah Chelsea defender hlui Branislav Ivanovic, Manchester City tana khel ṭhin AS Roma rinrawl ni ta Aleksandar Kolarov, midfield lamah Southampton player pawimawh Dusan Tadic, Manchester United player pawimawh ni phak Nemanja Matic leh Torino tana khel mek Adem Ljajic te ho an nei a, Russia-a talbuai mai tur niin an lang lo.

Costa Rica-in World Cup inbuatsaih nan Northern Ireland chu 3-0 in an sawp a, England erawh 0-2 in an ngam lo zui thung. Team ṭha zinga chhiar tel ni lo chunga 2014 quarterfinal lut thei team lakah beiseina neih thiam a harsa a, Real Madrid goalkeeper Keylor Navas, Sporting Lisbon forward Bryan Ruiz leh Arsenal forward Joel Campbell te chu an innghahna tur an ni ang.