Clay Court Roreltu Rafa

Bianga lawmna mittui luang chu a thar a ni a, French khawpui Paris-a thil thleng erawh kum danga thleng ṭhin ang bawk a ni. Rafael Nadal chuan a vawi 11 nan French Open nomawi a chawi ta. Spanish tlangval hian a khingpui Dominic Thiem lakah zahngaihna a lantir lo a, player dangte tan Nadal ropuina tih tawp tum chu beiseina beidawng mai a ni.

Pathianni zan khan Court Philippe Chatrier-ah French Open 2018 mipa singles final khelh a ni a, darkar hnih leh minute 24 chhungin world number 1 Nadal chuan Thiem lakah 6-4, 6-3, 6-2 in hnehna a chang. Nadal-a patea, Toni Nadal chuan, "Thil pangngai a ni lo" tiin a fapa thil tih chu a dah san thu a sawi hial.

Kum 32 mi Nadal hian Grand Slam nomawi 17 a chawi tling ta chiah a, ani aia chawi hnem chu Roger Federer (20 titles) chiah a ni. Player ropui pahnihte hi an chuai ṭan tawh ni a sawi awm ṭhin mah se, tun hnai major tournament hnuhnung paruk chu a zatvein an insem thei a ni.

A awlsam
French Open ṭan hma aṭangin Nadal hi rinkai a ni a, chutihrualin nomawi a inchuh pui Thiem hi clay court-a inkhel thiam ve tak a ni a, tun hnai season hnih chhungin clay-ah bik Nadal vawi hnih hneh thei a nih avangin 100% ngawt chuan champion tur hi a chiang nghal bik lo.

World number 1 Nadal-a'n Diego Schwartzman leh Juan Martin del Potro te lakah service a nei ṭha tawk lo. Mahse, final-ah erawh a ball vuak hmasa ber a fuh thei hle a, set thum a khelh chhungin set hmasa bera a service vawi khat a hloh bak a hloh nawn lo.

Seeded pasarihna Thiem-a'n set khatnaah Nadal a bei thei ve hle a, darkar khat leh minute khat chuang zet a chai pui ve hial. Set hnuhnung pahnihah erawh Nadal hian a ze pangngai chhuahin, a kut bawrah hliam tenau nei mah se buaina a tawk zui lo.

Austrian tlangval Thiem-a'n a ball vuak na tak hmang ṭangkaiin vawi sarih ngawt aces a siam a, winners vawi 34 a vaw chhuak bawk. Nadal aiin a ball vuak a na fal hle. Mahse, a service hmasa 61% a dik laiin Nadal erawhin 71% a vaw dik thung. Na tak takin ball vaw mah se Nadal-a'n a vaw let thei zel a, a khingpui pa in a do letna tur a neih zel avangin unforced errors vawi 42 ngawt a neih phah a ni - tihsual an inngah hleihna tak hi an danglamna chu a ni.

Dal theih loh
Kum 2005 khan Nadal-a'n a vawi khat nan French Open a khel a, a inlan hmasak ber aṭangin hnehsawh takin roreltu a ni zui nghal. Paris khawpuiah hian match 87 a khelh tawhah vawi hnih chiah chak loh a nei.

Monte Carlo, Barcelona leh Rome Open nomawi chawi chunga a inlan avangin a match hmasa paliah chuan set a hloh lo a, set 37 zet la zawnin tennis khawvela set la zawn rei ber Bjorn Borg (41 set) a hlat lo hle; quarterfinal-a a khingpui Diego Schwartzman lakah set khat a hloh zauh tih loh chu a chesual nawn tawh lo.

A vawi 11 nana Nadal-a'n French Open nomawi a chawi chiah hian Margaret Court-i record nih rualin inelna lian pakhata champion hnem ber a ni chiah. Australian hranghlui Court khan 1960 - 1973 chhung khan vawi 11 zet Australian Open nomawi a chawi. Open Era (1968 hnu lam) bik chinah chuan Nadal record hi a ṭha fal hle.

Hmabak
King of Clay tia hming lem an pek Nadal hi a inkhelh thiamna bik hmunah chuan player dangte nena khaikhin theih loh khawpin a ṭha fal a, mi ṭhenkhatin an sawiselna chu hard leh grass court-ah a hlawhtling tawk lo tih a ni ṭhin.

Amaherawhchu, Nadal hian Australian Open pakhat bakah, US Open pathum leh Wimbledon title pahnih a la tawh bawk - a ṭhat lohna hmun nia an sawia a record hi Federer tih loh a elpui player dang ten chuan an tluk chuang lo!

Kum 36 mi Federer-a'n season hmasa ang bawkin French Open a khel lo a, grass court lama chet ṭhat a duh vang ni bawk mah se a vanglai pawha Nadal a hneh theih lohna hmun a nih avangin kum tam tawh lamah chuan inlan loh kha a fuh zawk.

Player ropui pahnihte hi an la inel chho zel dawn niin a lang a, kum nga deuhthawa naupang zawk thahrui ngah Nadal hian Roger Ropuia record ropui a nihrual phak lo a nih pawhin a hnaih chho zelin a rinawm.