Coleman-a'n China a pan

Euro 2016 semifinal-a Wales hruai thlengtu Chris Coleman chuan China lam a pan a, Chinese Super League club Hebei China Fortune a enkawl dawn.

Kum 48 mi manager hian April khan Sunderland a chhuahsan a, Premier League club hlui hi Championship match 29 a enkawl hmanah vawi nga chiah hnehna chanpuiin League One lamah a tlakpui a ni.

Coventry, Fulham leh Real Sociedad boss hlui hian West Ham pantu Manuel Pellegrini hmun ruak a luah dawn a, CSL-a 10-na ni mek team in a lakah beiseina an nei sang ang.

Hebei hian khawvel huap hriat hlawh player zingah Barcelona midfielder hlui Javier Mascherano leh Arsenal forward hlui Gervinho te an kawl mek.