Serena a dam hman ang -coach

Tennis hmeichhe world number 1 hlui Serena Williams chu hliam vangin French Open aṭangin inhnukdawk mah se, a coach Patrick Mouratoglou chuan Wimbledon khel tura a rawn kir hman tur thu a sawi.

Grand Slam vawi 23 champion tawh Serena hi Maria Sharapova nen an inkhelh dawnin a service kawngah harsatna a nei a, singles bakah doubles a khelh kawp bawk avangin a taksain a zo lo nia ngaih a ni.

Serena-i coach Patrick Mouratoglou chuan, "Chawlhkar hnih chhungin a dam fel hman ang. Maria nena an inkhel tur kha a tan ṭha hle mah se a hliam kha inkhelh luih pui chi a ni lo," tiin a sawi.

Kum 36 mi Serena tan Roland Garros kha fa a neih hnua a Grand Slam tournament hmasa ber a ni a, seeded zingah a tel phak lo. Wimbledon buatsaihtu lam erawhin a lakah duhsakna an lantir mai thei niin an sawi tawh a, seeded zingah a tel a nih chuan round hniam lamah player langsar a pumpelh ve thei ang.