Swansea-ah manager thar

Premier League aṭanga tla hlim Swansea chuan a rang thei ang bera English football sang ber khelhzui leh an tum a, Graham Potter chu an manager thar a nih thu an puang.

Kum 43 mi Potter hian Swans tan kum thum daih contract a ziak a, a rual hian assistant pahnih Billy Reid leh Kyle Macaulay te an lut ve bawk. Potter-a'n Carlos Carvalhal a thlak a, tun hnai kum hnih chhunga an manager pangana tur chiah a ni.

Potter chuan, "EPL aṭanga tlak hnua an rilru awmdan tur chu ka hriatthiam pui a, he club tan hian ka theihtawp chhuahin ka bei dawn a ni," tiin a sawi.

English manager hian Swedish club Östersund chu 2010 aṭang khan a enkawl tawh a, Swansea a enkawl dawn hian a chhuahsan ve chiah. Östersund hi third division aṭangin Swedish football league sang ber Allsvenskan a inhlankaipui a, 2016-17 phei kha chuan Swedish Cup-ah a champion pui.