FIFA World Cup 2018 chanchin ngaihnawm

Pet goal tam ber Muller
Germany international Thomas Muller hi Russia rama inlan tur zingah World Cup-a pet goal tam ber a ni a, vawi 10 a khung tawh. Bayern Munich forward hian kum 2010 khan goal nga a khung bakah assists vawi thum a nei a, Golden Boot a dawn bakah best young player atan thlan a ni. Kum 2014-a an champion ṭum khan goal nga khungin Silver Boot a dawng leh bawk.

Muller hian Euro 2012 khan semifinal an thleng chungin goal a khung lo a, Euro 2016-ah pawh goal a khung loh bakah quarterfinal-a Italy an hneh ṭumin penalty shootout-ah a pet goal lo. Euro C'ship-ah Muller-a'n goal khung harsat mah se World Cup-ah erawh pet goal thei bik a ni a, Russia ramah goal khung tam ber Miroslav Klose khum theihna hun

ṭha a nei a, World Cup dang khel leh thei dinhmunah a la ding bawk.

Kumina inlan tur zinga Muller-a hnaih bertu chu inelna hnuhnung bera golden boot dawngtu Colombia midfielder James Rodriguez (6 goals) a ni a; Australia forward Tim Cahill, Uruguay forward Luis Suarez, Argentina forward pahnih Gonzalo Higuain leh Lionel Messi (5) ten goal nga an khung tawh bawk.

Barcelona forward Messi hi kum 2006 aṭang khan inlan ṭanin kum 2010-ah a khung lo a, inelna hnuhnung berah erawh goal li khungin Argetina final a thlenpui. Hetihlai hian Portugal captain Cristiano Ronaldo erawh World Cup vawi thum a inlan tawhah goal khung vek mah se goal khat ṭheuh a khung avangin goal thum chauh a la khung.

Naupang ber Daniel Arzani
Russia rama inlan thei tur hian hming 736 ziahluh an ni a, chung zinga naupang ber chu Australia international Daniel Arzani a ni a, Melbourne City attacking midfielder hi ram tan vawi hnih chiah la inlan a. Amaherawhchu Arzani hian Hungary nen an inkhelh ṭumin a luh aṭanga minute khatna lekah goal a khung nghal a, 2-1 hnehna an chang.

Arzani hi tikimtu chauh ni loin Russia ramah pawh a inlan ngei beisei a ni a, an match hmasa bera France nen an inkhelh ṭuma a inlan a nih chuan kum 19, thla nga leh ni 12-a upa a ni chiah ang. Les Bleus hian rawlthar duhawm ang ber hiala sawi theih Kylian Mbappe an kawl ve bawk a, PSG striker hi chu Ligue 1 leh Champions League-a hming chher tawh a ni a, Didier Deschamps-a hnuaiah player pawimawh tur a ni ang.
Real Madrid academy chhuak Achraf Hakimi hian Zinedine Zidane-a hnuaiah vawi kua a inlan tawh a, right back Dani Carvajal thachhang dawltu niin Los Blancos duat lai hi Morocco-ah khehna hmun a neih ngei a beiseiawm.

Tawi zingah Shaqiri
FIFA-in World Cup khel tur player 736 te chanchin an tichhuak a, an san zawng leh rih zawngah te website hrang hranga player record tarlan nena inang lo a awm. Tun ṭuma tarlanah hian FIFA tihchhuah rin a ni.

Russia khel tur zingah hian tawi ber bik an awm lo a; Alberto Quintero (Panama), Al-Shehri Yahya (Saudi Arabia) leh Xherdan Shaqiri (Switzerland) te chu 165 cm an ni a, anni aia tawi an awm tawh lo. Stoke City winger Shaqiri hi Switzerland innghahna tur a ni a, kum 27 mi winger Yahya Al-Shehri hi Saudi Arabia pawh ram tan vawi 57 zet a inlan tawh a, kum 30 mi midfielder Alberto Quintero hi Panama tan vawi 90 a inlan tawh bawk.

World Cup khel tur zinga a tawi pariat thlan chhuah hi an khelhna position thlir chuan tlarhnung an awm lo a, mual sir aṭanga goal nawr ṭhinte an ni hlawm. Goal venghimtu lamah player sang an tam a, mual sir goal nawr turin che rang leh pa te an tam tih a lang.

Whiteside-a record khumtu la awm lo
FIFA World Cup khel tawh zinga naupang ber chu Norman Whiteside a ni a, Northern Ireland striker hian kum 17 leh ni 41-a upa ni chungin Yugoslavia nen an inkhelh ṭumin 1982 World Cup khan a inlan.

Sang ber
Hming Ram San Zawng
Lovre Kalinic Croatia 201cm (6' 7.13")
Jannick Vestegaard Denmark 200cm (6' 6.75")
Federico Fazio Argentina 199cm (6' 6.38")
Thibaut Courtois Belgium 199cm (6' 6.38")