T20 World Cup semifinal ; Zanin 7:30-ah England Vs New Zealand
T20 World Cup semifinal chu zanin dar 7:30 hian Sheikh Zayed Stadium-ah khelh a ni dawn a, England leh New Zealand te an inhmachhawn dawn. 2019 Cricket World Cup Final rematch tihin a sawi theih a, inkhel a hmuhnawm bik a beisei theih ang.
Final kha...
Lord's, London-ah July 14, 2019 khan Cricket World Cup final khelh a ni a, over 50 khelh zawhah New Zealand leh England hi 241 runs ve ve siamin an inhnehtawk. Super Over hmangin chak zawk zawn a ṭul hial.
Three Lions leh Black Caps hian 15 runs ve ve an siam a, amaherawhchu boundary vaw hnem zawk England-in hnehna an chang hram. Final hmuhnawm bikah England an vannei a, Black Caps erawh World Cup-ah a zawnin final lut mah se a vanduai zawkah an ṭang ve ve.
T20 ve thung
T20 World Cup hi kum 2007 aṭanga khelh ṭan kha a ni a, kumin hi ṭum sarihna ni. New Zealand tan tun ṭum hi semifinal vawi thum an thlenna a ni a, final erawh an la lut ngai lo.
England hian T20 World Cup hnuhnung berah final an lut a, West Indies an hneh lo. Chutihrualin Three Lions hian nomawi an chawi tawh a, kum 2010 khan Australia hnehin a champion.
An sulhnu thlirin England an chungnung hret a, amaherawhchu Super 12-a an khelh dan thlirin team pahnih hi an intluk tawk. Three Lions leh Black Caps hian vawi li ve ve hnehna an chang a, vawi khat ve ve a chak lo.
En châkawm
New Zealand thluak bur Kane Williamson hi danglamna thlentu a ni a, batting-a a ṭhatna piah lamah team a hui khawm ṭha a, hun harsaah thultukna dik a siam ṭhin. Black Caps opener Martin Guptill leh Daryl Mitchell te team chakpui thei turin an ṭha tawk a, bowler lamah Trent Boult, Tim Southee leh Ian Sodhi te an rintlak viau bawk.
England-in match pawimawh bikah opener Jason Roy an chhawr thei dawn lo a, channa nasa tak a tling. Roy hi James Vince, Sam Billings, David Wiley, Tom Curran leh Reece Topley te zinga tu emaw berin an thlak dawn a, thutlukna siam awlsam a ni dawn lo.
Chutihrualin Three Lions batter Jos Buttler, Dawid Malan, Liam Livingstone leh Eoin Morgan te hi team chakpui tham an ni a, all rounder Moeen Ali a pawimawh leh dawn. A vawmtu lamah Tymal Mills, Adil Rashid leh Chris Woakes ten hna an thawhṭhat a ṭul bawk ang.