India-in chawlh an mamawh - Coach Shastri

T20 World Cup ṭan hmaa champion tura rinkai India chuan group match hnuhnung berah Namibia wicket kua zetin hneh mah se semifinal an thleng zo lo. India coach Ravi Shashtri chuan taksa leh rilru lama ngai awh turin Indian player-ten chawlh an mamawh thu a sawi.

A tlai hret
India-in match hnuhnung pathumah an khingpui an sawp vek a, mahse match hmasa pahniha Pakistan leh New Zealand an hneh loh avangin 'se bo hnua se kawng khar ang' chauh a ni.

Thawhṭanni zana India-in Namibia an hmachhawn hma hian beisei an nei tawh lo tih an hria a, chutichung chuan Dubai International Stadium-ah Men in Blue-in an thiamzia an pholang.

Ravindra Jadeja (16/3) leh Ravinchandran Ashwin (20/3) ten wicket thum ve ve an siam a, Namibia-in 132/8 runs chauh an siam. India tan opener pahnih Rohit Sharma (56) leh KL Rahul (54*) te an che ropui a, Suryakumar Yadav (19*) rawn che ṭha bawkin over 15.2 lekah hnehna an chang.

Chawlh an mamawh
India hian September 6 thleng England nen Test match an khelh hnuin IPL an khel zui a, T20 World Cup an khelh zui lehnghal avangin hahchawlhna hun ṭha an nei lo. Coach Ravi Shastri chuan, "Player-ten chawlh a mamawh. Kei ngei pawh rilru lamah ka chau a, ka kum angah chuan a awm tho. Chutihrualin player-te chu taksa leh rilru lamah an chau a, hahdam an mamawh a ni," tiin hahdam an mamawh thu a sawi.

Shastri hian India team hi kum nga a enkawl tawh a, Rahul Dravid-a'n a thlak dawn. India captain Virat Kohli pawhin World Cup zawhah T20 bikah captain hna a chawlh tur thu a sawi lawk a, Namibia laka hnehna an chan hi Kohli-a'n India team T20-a kaihhruai hnuhnung ber a ni.