Tun hi NT-a ṭhat lai ber a ni - Gtea

Mizo boxer NT Lalbiakkima'n November 27 khian IBA intercontinental title a kawl lai chu hum a tum dawn a, Siaha boxer strength and conditioning coach Biakzuala Khenglawt (Gtea) chuan tun hi NT-a ṭhat lai ber a nih thu Vanglaini a hrilh.

Gtea chuan, "Theihtawp chhuahin kan enkawl. A rihna tihhniam kan duh a, chumi rual chuan a thahrui a hloh kan hlau bawk si - thlai hnah lam kan ei tir nasa a, a rihna belhchhah thei tur chi hrim hrim chu kan pe lo tawp," a ti.

NT-a hian Vanglaini hnenah, "Kar thum chhungin kg sarih vel ka paih tawh," tiin a sawi a, Gtea chuan, "Tlemin a lo rit ve hman deuh a, chumi paih tur chuan theihtawp kan chhuah a, a thawkrim em a ni," tiin a boxer enkawl chu a fak.

Mizo strength and conditioning coach ṭha pawl Gtea chuan, "A ei tur engkim dan ang thlapin kan ti a, chumi piahlamah chuan inenkawlna atana pawimawh ang chi, kan ban phaka a ṭha ber ang chu kan pe. Hemi atana kan sum sen ringawt hi a tam tawh lutuk," a ti a, Siaha boxer-in Mizo hming a tih ṭhat theih nan an ṭang hle.

NT-a hian IBA inter-continental title a kawl lai chu Thai boxer Gerttipong Kumsahwat lakah humhim a tum dawn a, Dawrpui Multipurpose Hall-a inhnek tur hi LPS leh Chhimbal app-ten pay per view hmanga en theih turin an pe chhuak ang.

Mizo boxer NT-a leh Kumsahwat te hi round 10 chhung inhnek turin ruahmanna siam a ni a, Siaha tlangval hi Mizo professional boxer zinga round 10 fight hmachhawn hmasa ber tur a ni dawn.

Mahse, Gtea chuan, "Round 10 an inhnek thleng dawn lo. Enkawlna kan pek ṭhat rah te, ama inpekna te, coach Lalmuanpuia'n a kaihhruaina ṭhate a lang a, NT-a hian a ṭhat lai ber a tawng - round rei a mamawh lo ang," tiin a boxer a rin tawk thu Vanglaini a hrilh.