Chanmari Zothan an tling zo ta lo

Hero Futsal Club Championship-ah Mizoram aiawha tel Chanmari Zothan Futsal Club chuan nimin khan Mohammedan 5-1 in an hneh lo a, group stage paltlang loin an tla.

Mohammedan chak rualin Super Strikers Futsal Club tan semifinal beiseina a tawp nghal a, group A inkhel dangah Karnataka champion Super Strikers hian Baroda Football Club 5-4 in an hneh lo.

AIFF hnuaia futsal inelna lian tham hmasa berah hian team 16 an tel a, group paliah inṭhendarhin a sang ber ṭheuhin semifinal an lut dawn. Mizoram aiawha tel Chanmari Zothanin beiseina sang tak nen Delhi pan mah se kut ruakin an rawn kir a ṭul dawn.

Chanmari Zothan hian an match hmasa berah Super Strikers 6-4 in an hneh lo a, Baroda an hmachhawn ṭumah insiamṭhain 7-1 in an chak. Semifinal lut turin goal thum tala Mohammedan hneh mamawh mah se Kolkata club hian 5-1 in an hneh ta zawk.

Nimin inkhelah hian Mohammedan tan Filbert Ignatius Pereira-a'n hattrick a siam bakah Snedden Vito Medeira leh Hilton Menino Fernandes ten goal khat ve ve a khung a, Chanmari Zothanin goal li an chhuah laiin K. Roluahpuia hmangin goal khat an khung.