England tan Smith Rowe an ko

Arsenal midfielder Emile Smith Rowe chu World Cup qualifier khel turin England tan koh a ni a, nimin aṭang khan an ram senior team training a zawm - player ṭhenkhat erawhin ram tana kohna hi an chhang thei lo.

Manchester United player pahnih Marcus Rashford leh Luke Shaw ta bakah Mason Mount leh James Ward-Prowse te chuan hliam leh damlohna vangin kohna an chhang thei lo a, tun hnaia khel ṭha thei tak Smith Rowe tan hmun a inhawn phah.

England tan kum bithliah inelna hrang hrangah chuan Smith Rowe hi a inlan tawh ṭhin, tun ṭumah pawh hian a tirah chuan Under 21 team atan koh a ni. Mahse, player ṭhenkhat an inlan loh avangin an ko leh a, a hun ṭha neih hi chhawr ṭangkai ngei a tum ang.

Squad an puantirh pawh khan media lamin Smith Rowe tel loh chhan hi Gareth Southgate an zawt. England manager chuan, "A tel teuh hle," tiin a chhang a nih kha, season a hman ṭhat miau avangin Southgate pawhin a chet dan hi a hmuh hmaih lo.

Arsenal academy chhuak, kum 21 mi Smith Rowe hian tun season Premier League a la khel kim vek a, tun hnai a match hnuhnung pathumah phei chuan goal a khung vek; goal khung leh assist bakah khelmual chhunga a chet danin fak a hlawh thei hle.

Smith Rowe an koh leh takah chuan England squad-ah hian Arsenal player pathum an awm. Nikum lam aṭanga player pawimawh ni tawh Bukayo Saka leh goalkeeper Aaron Ramsdale te chu koh an lo ni tawh bawk - defender Ben White erawhin hmun a chang rih lo.

Euro 2020-ah khan White hi koh leh hnuhnawh a lo ni tawh. Mikel Arteta hnuaiah a intuai hriam leh mek a, league season kal laiah clean sheet vawi nga an nei tawh a, tun ang zela a khel thei a nih chuan ani pawh hi England tana koh a nih leh thuai a rinawm.

Three Lions hian group I-ah match riat an khelh aṭanga point 20 hmuin hma an hruai mek; an hnuaia awm Poland aiin point thumin an sang zawk. November 12, Zirtawpni hian Albania an mikhual dawn, chumi hnuah San Marino an lenchilh leh ang.

Southgate-a naute hian playoff khelh ngai loa tlin nghal an duh a nih chuan chetsual a thiang lo. An khelh hmabak pahnih aṭanga tling chiang tur chuan point li hmuh an la mamawh, chak loh a thiang lo tihna a ni.