Xavi a haw ta: Hmabak erawh a ko

Barcelona legend Xavi chu Catalan club coach thar a nihna angin Thawhṭanni khan mipui hmaah tlangzarh a ni ta a, kum 41 mi coach lawm turin Nou Camp-ah fans sing tel an pungkhawm!

Xavi chuan, "He hmunah chuan vawi khat chak a tawk lo - chak zawhah pawh chak leh zel kan duh. Kan hun tawn a thim tih ka hai lo a, mahse, hmachhawp thui tak nei chungin ka lo pen chhuak ta," a ti a, a hmaa chona inchhawp a hai lo.

Barcelona hian league match 12 an khelh aṭangin point 17 chauh an la nei a, table-ah pakuana an ni mek - Inrinni zanah Catalan derby-in a lo hmuak nghal a, Xavi hoa an match hmasa berah Espanyol an mikhual ang.

Xavi chuan, "Espanyol nena kan inkhel tur kan ngaihtuah leh der tawh. Kan khelmualah ngei derby kan khel dawn a, hnehna chan tumin kan inbuatsaih ang," a ti a, point thum nena bul ṭan a beisei.

Naupangte u...
Player a nih laia Barca tana nomawi a chawi theih ang zawng zawng chawitu Xavi chuan, "Player naupang zawkten hma an sawn theih nan he hmunah hian ka lo kal a, tu pawh he club tana theihtawp chhuah turin kan beisei vek - player-te hmuh vek kan duh a, training-na aṭanga chher kan duh a ni.

"Player naupang tak tak kan nei a, Nico leh Gavi te hi an kum zat ngaihtuah chuan tun ang level-ah ṭha taka an khel thei hi hriatthiam a har zawk a, match tin an khelh ṭhat theih nan puih an mamawh - match tin hi hi final exam ang mai a ni," a ti a, a sawifiah thiam hle.

Catalan club-in an academy chhuak player an chhawr thiam ṭhin avangin an hming a ṭha a, Barca president a nih hmasak pawha La Masia hmingṭhatpuitu Joan Laporta-a'n anmahni chhul chhuak ngei player chhawr tam leh a duh - Ronald Koeman a chhuak a, Laporta leh Xavi thu a inhmu tawh ang.

Barca squad-a player beiseiawm zual zingah Gavi (kum 17), Ansu Fati (19), Nico González (19), Riqui Puig (22), Óscar Mingueza (22) leh Eric García (20) te chu Catalan club academy chhuak an ni a, La Masia mi leh sa ni kher lo zingah Pedri (18) leh Yusuf Demir (18) te chungah pawh beiseina a sang hle.

Al Sadd a ni lo!
Qatar club-ah Xavi a che ṭha viau a, Barcelona-ah coach ṭha a ni tih pholan chhunzawm a duh ang. Mahse, a harsa dawn. Xavi chuan, "Kalphung piahlamah ngaihtuahna leh suangtuahna a pawimawh. Al Sadd-a 3-4-3 kan hman chhan chu Qatari football kan thunun vang a ni a, helai nen chuan a inang dawn lo.

"A tawpah chuan Johan Cruyff kalphung bawk kha a pawimawh chu a ni. Ka defender hmasa ber chu ka striker a ni a, goalkeeper chu attacker hmasa ber a ni bawk. Tactical taka hna thawh a, goal nawr a, inkhel thunun chu kan tum tur a ni," a ti.

Xavi hian tun hmain Barca hi vawi hnih a lo hnar tawh a, Catalan club a hnar chhan sawiin, "Chhungkua leh ka career tan Barca sawmna hmasa pahnih pawm kha chu kan thei loah kan ngai a ni. Ka tan a la hma hret a, a kar laka President inthlan awmte hlei hlei khan min tibuai.

"Mahse, tunah chuan Laporta nen hian inhnaih em em reng kan ni a, kan club President ṭha ber a ni," tiin Lionel Messi a chhuahtir avanga sawisel hlawh President chu Barca-a a kir chhan lian tak pakhat a nih thu a sawi.

Messi duhsakna
June 2024 thleng Barca enkawl tura contract ziaktu Xavi chuan, "Lionel Messi-a'n duhsakna message min rawn thawn a, mahse, tunah chuan kan player neih tawh lote ngaihtuah reng hun a ni tawh lo," a ti a, "Messi awm se chuan..." tia lunglen bansan a hun tawh thu a sawi.

Xavi chuan, "Kan style kan hriatthiam a ngai a, chak duhna tak tak thinlung pu chunga inkhelh hi ka duh ber chu a ni mai," a ti a, player inthlahdah tan Xavi ruahmannaah hmun a awm lo tihna a ni.

Barcelona hi La Liga-ah chauh pawh ni lo, Champions League lamah pawh an dinhmun a awhawm loh hle. Match li khelh tawhah vawi hnih chiah an la chak a, an group aṭangin Bayern Munich an tling chiang tawh.

Catalan club hian Benfica nen hmun ruak pakhat dang an inchuh dawn tihna a ni - Xavi hmabak a hautak a, mahse, he thu hre saa haw a nih avangin a club tan a theihtawp a chhuah dawn.