Coach nih tum Djokovic

Novak Djokovic chuan inkhelh a chawlhsan hunah pawh tennis mangṭha mai a tum lo. Engtik niah emaw chuan coach ṭha tak a la nih theih a rin thu a sawi a, a hun tur erawh a sawi tel thei lo thung.

Serbian star hian tun hnai khan Paris Masters title a la a, record duhawm hrang hrang a chelh hnem ta hle. World number 1 ni chunga kum tawp hmang hnem ber a ni dawn, Masters 1000 title la hnem ber a ni tawh bawk.

World number 1 hian January thlaah Australian Open nomawi a chawi a nih chuan Grand Slam nomawi chawi hnem ber a ni bawk a, tuna a sulhnu neih pawh a ropui tawh tehlul nen, record ṭha dangin a la hmuak nual.

Kum 34 mi Djokovic chuan, "Tennis zin kawngah hian thil tam tak tawnhriat ka lo nei ve tawh. A ṭha leh ṭha lo lam pawh sawi tur ka ngah ve tawh hle, ka thil hmuh leh hriatte hi player naupang zawkte hlan chhawn ka duh.

"Inkhelh reng duh mah ila a theih dawn loh, chutih hunah chuan khawhar takin tennis ka ngaihtuah chang a la awm dawn. Coach ni chhunzawm ila nun hlimawm tak ka hman theih ngei ka ring," tiin coaching chu a rilrua a len thu a sawi.

November 14-21 chhung hian Turin khawpuiah ATP Finals khelh a ni dawn a, a thiam zual pariat inelnaah Djokovic hi a inlan ang. ATP Finals hnuah hian an ram Serbia tan Davis Cup finals a khel leh bawk ang - heng pahnih hi tun season atana a hmachhawp an ni.