Newcastle coach thar Howe

Saudi Public Investment Fund hnuaia hausa thar Newcastle United chuan coach atan Eddie Howe an lalut ta a, Bournemouth coach hlui hian kum 2024 nipui thleng cham turin St. James' Park-ah hian contract a ziak.

August 2020-a Bourne-mouth a chhuahsan hnua club enkawl nei loa awm reng Howe chuan, "Hun duhawm tak a ni a, chutihrual chuan kan hmaah hnathawh tur tam takin min hmuak a ni," a ti a, a hna a awlsam dawn lo tih a hria.

Kartawp Premier League inkhelah Newcastle hian Brighton & Hove Albion chu 1-1 in an inhnehtawkpui a, he inkhel hi Howe hian a hmunah a en.

English coach chuan, "Player-te nena training ground-a hnathawh ka châk tawh takzet. Hun ṭha tak min siamsak avangin club neitute chungah lawmthu ka sawi a, club ṭantuten lawm taka min lo pawm avangin ka lawm em em bawk. Zinkawng kan zawh ho tur hian min tiphur hle a ni," a ti.

Magpies-ah hian Howe-a'n Bournemouth-a a lo enkawl tawh Callum Wilson, Ryan Fraser leh Matt Ritchie an awm sa a, players zingah pawh a mikhual dawn lo.

Newcastle neitu zinga mi Amanda Staveley chuan uluk taka engkim an thlir hnuah pawh Howe-a sulhnu leh hmathlir chuan a hmin takzet thu a sawi a, "He hmuna kan hmachhawpte nen amah hi a inmil hle a ni," tiin a sawi.

Amanda Staveley-i leh a thawhpuiten Magpies an lei khan coach an thlak tur thu chu ri ring ber a ni a, October 20 khan coach Steve Bruce chuan inhriatthiam tawnnain a chhuahsan thu puan a ni.

Mahse, Magpies hian an beisei ang coach an hmu lawk bik lo a, Villarreal manager Unai Emery hming phei chu a ri ring hman hle. Mahse, Arsenal boss hluiin Spain-a cham a thlang a, a tawpah Howe a vanneih phah.

Kum 43 mi Howe hian December 2018 khan League Two mawngphaha an awm laiin Bournemouth a enkawl ṭan a, Premier League hial hruai thlengin English top flight-ah season nga chhung a champui thei.

Magpies hian November 20 zanah Brentford an mikhual dawn a, coach thar Howe hnuaia an match hmasa ber tur a ni ang - en a châkawm tawh hle.

Newcastle hian league match 11-ah point nga chiah an la hmu a, tun season-ah chak an la nei miah lo - an point hmuh zat hi mawngphah luahtu Norwich nen a inang a, 19-na an ni mek.