Norwich-in Lampard an bia

Premier League club talbuai Norwich City chuan English top flight-a inhamtan dan an ngaihtuah chhunzawm zel a, coach Daniel Farke an ban hnuah coach thar atan Frank Lampard chu inbiakna an neihpui.

Canaries hian Lampard bakah hian Aston Villa ban tak Dean Smith leh Southampton boss Ralph Hasenhuttl chu an beisei an ni a, mahse, Chelsea coach hlui Lampard hi a awm khan ang bera sawi a ni.

Khawthlang media-ten an tarlan dan chuan Lampard hian Norwich enkawl hi a career atan a ṭhat dawn leh dawn loh a ngaihtuah mek a, Canaries lam pawh hian chiang taka thutlukna siam an la thei rih bik lo niin a lang.

Kum 43 mi Lampard hian inkhelh a chawlhsan hnuah coaching lamah hun a hmang a, May 2018-July 2019 inkar khan Derby County a enkawl a, July 2019-ah vek chhuahsanin Chelsea a pan.

Mahse, Stamford Bridge-ah player a nih laia a ropui angin a ropui thei lo a, January 2021 khan a hna aṭanga chawlhtir a ni - a chhuah hnuah Chelsea an ṭha sawt!

Norwich sporting director Stuart Webber chuan coach zawn hna hi a thawk mek a, Saints boss Ralph Hasenhuttl chu an duh ber ni mah se St. Mary's ah a ngheh avangin thlem chhuah theih an inring lo.

Smith pawh Villa-in duh loa an ban ni mah se kum 2019-a Premier League khel tura Villa hruai thlengtu a ni a, Norwich tan chuan a tawnhriat ringawt pawh hi chhawr ṭangkai theih tak tur a ni.

Norwich hian team 20 inelna Premier League-ah a mawngphah an luah mek a, league match 11 aṭangin point nga chiah an la nei - an match hnuhnung berah 2-1 a Brentford an hneh chungin Farke an ban a, November 20 zanah Saints an mikhual zui dawn.

Hetihlai hian Villa pawhin league match nga chhung a zawna an chak loh hnua an ban tak Smith hmun ruak luah tur an zawng mek a, Rangers boss Steven Gerrard, Belgium coach Roberto Martinez, Denmark manager Kasper Hjulmand leh Saints manager Hasenhuttl te hming an sawi ri mek.