Argentina tan Messi a feh chhuak dawn

Paris Saint-Germain tan khel thei lo mek mah se Lionel Messi chu Argentina tana khel turin a feh chhuak! PSG sporting director Leonardo chuan dam chiang lo chunga player koh an ni chu FIFA lam nen sawiho ngaia a hriat thu a sawi.

Messi hian PSG a zawm hnuah hliam a nei, a khup leh tihrawl hliam vangin match ṭhenkhat a khel thei lo. RB Leipzig nen Champions League an khelh ṭumin a inlan lo a, Ligue 1 match an khelh hnuhnung berah a inlan thei lo bawk.

Amaherawhchu, world champion vawi hnih ni tawh Argentina chuan an captain hi World Cup qualifier khel turin an ko miau a, an zin chhuah a ngai - ram tana kohna a chhan danah erawh tih dik loh leh dan bawhchhiat a nei lo.

Paris Saint-Germain sporting director Leonardo chuan, "Player hliam nei, ngaiawh leh tura inenkawl lai inkhel tura koh hi a fuh lo. Hetiang dinhmun hi a thleng fo thei, chuvangin FIFA nena sawiho chi a ni," tiin a sawi.

PSG tan Messi hian inelna hrang hrangah match riat chauh a la khel a, goal thum a khung tawh. A goal khung zawng zawng hi Champions League-ah vek a ni a, league-ah goal a la khung lo; Barcelona tana a khelh ang chuan a la khel chhuak thei rih lo.

Messi-a'n PSG a zawm dawn khan inremna chi hrang hrang an nei, chung zingah chuan Argentina tana kohna a dawng a nih chuan club-in an dal thei lo ang, tih a tel. Ram tana kohna chhan hi a tih tur dik tak a ni, hliam a neih belh ang tih chu PSG lamin an hlauh a ni thung.

PSG hian Ligue 1 match 13 an khelh aṭanga point 34 hmuin hma an hruai mek, anmahni hnaih bertu Lens aiin point 10 zetin an sang fal. Tun ṭum international match neih turah hian Messi bakah tun hnaia hliam nei Leandro Paredes chu Argentina tan hian koh a ni bawk.

Messi, Angel di Maria leh Paredes te awmna La Albiceleste hian tun kar tawpah Uruguay an hmachhawn dawn a, a hnuah Brazil nen an inkhel zui ang. Qatar World Cup khel tur zawnna a nih miau avangin an ngai pawimawh hle.