Europe aṭanga World Cup khel tur a hriat hnai
FIFA World Cup khel tur zawnna neih chhoh mek a ni a, Europe aṭanga World Cup khel tur zawnna thawh khatna a zo hnai. Tun ṭum international break-ah hian match hnih khelh a ni leh ang a, Europe aṭanga Qatar zin tur ram 13 aṭanga 10 a chiang dawn.
Ram 13
Europe aṭangin ram 13-in World Cup an khel dawn a, tun ṭum qualifying round aṭangin ram 10 an tling dawn. Ram pathum dang hi playoff hmanga zawn tur a ni.
Playoff-ah hian group tina pahnihna ṭheuh bakah Nations League-a ti ṭha pahnih an tel ang. Ram 12 hi hmun thumah pali zela ṭhen hran an ni ang, ṭhen hran pakhatah hian ram pali zel an awm ang a, semifinal leh final hmangin World Cup khel tur an zawng ang.
Portugal leh Ronaldo
Cristiano Ronaldo-a'n Qatar zin ngei a duh a, chutiang bawkin World Cup hlutna belhchhah turin Ronaldo a tel ngei a ṭul bawk. Amaherawhchu Portugal hi tling nghal lo thei dinhmunah an ding.
Portugal hian Ningani zanah Republic of Ireland an hmachhawn dawn a, point an hlawh chhuak a nih chuan World Cup khel turin match hnuhnung bera Serbia draw a tawk a ang. Chutihrualin Serbia hian Lisbon-ah Portugal an hneh chuan an tling dawn.
Ngaihtuahawm Spain
Euro 2020 leh Nations League-a che ṭha Spain dinhmun a him lo a, match ruk khelhah Sweden aiin point hnihin an hmu tlem zawk. La Roja leh Sweden hi match hnuhnung berah an la inhmachhawn dawn.
Seville-a an inhmachhawn hma hian Sweden hi Georgia nen an inkhel dawn a, Spain leh Greece te an inkhel bawk dawn. La Roja tan Qatar zin turin match hnuhnung pahnihah chak ve ve a ngai.
Italy pawh
European champion Italy pawh an dinhmun a him lo, group C-ah Azzurri hi Switzerland nen point 14 ve ve a hmu mek. November 12, Zirtawpni zan hian Rome-ah ram pahnih hi an inhmachhawn dawn a, heta chak zawk hi group hmahruaitu ni turah a ngai theih ang.
FIFA hnuaia inelna World Cup khel tur zawnna a nih avangin head to head aiin group pumpui goal difference ngaih pawimawh a ni a, an inhnehtawk a nih chuan goal difference nei ṭha zawk Azzurri dinhmun a ṭha ang.
France, Belgium leh Denmark
Group D-ah Nations League champion France la tling chiang lo mah se an dinhmun a ṭha tawh a, Didier Deschamps hote an chesual viau a nih loh chuan Qatar zin ngei turah a ngaih theih.
Les Bleus ang thoin group E-ah Belgium dinhmun a ṭha a, FIFA ranking number 1 hi qualifying chinah hi chuan team ṭha bik an ni ṭhin hrim hrim. Group F-ah Denmark an tling chiang tawh a, playoff khel tur a la hriat loh thung.
Van Gaal-a hnathawh
Netherlands-in Euro 2020-a beisei an phak loh avangin coach Frank de Boer an ban a, Louis van Gaal an lalut. Dutch manager tawnhriat nei ṭha Van Gaal-a hnuaiah Oranje record a ṭha.
Van Gaal-a hote hian Montenegro an hneh a, match tawp bera Norway nen an inhnehtawk leh chuan an tling dawn. Chutihrualin Erling Haaland erawh Qatar zin lo thei dinhmunah a ding a, inhliam vangin tun ṭum qualifying-ah hian Norway tan a inlan thei dawn lo.
Russia leh England
Group H-ah Russia dinhmun a ṭha ber a, Croatia erawh playoff khel thei dinhmunah an ding. November 14, Pathianni zan hian Russia leh Croatia te hi an la inkhel dawn a, Luka Modric telna team hian hnehna an chang a nih chuan Russia chungah an awm thei ang.
Euro 2020 finalist England tan tling turin point li hmuh a la ngai. Chutihrualin Three Lions hian Albania leh San Marino te an la hmachhawn dawn a, an elpui ber Poland nen an inkhelh tawh dawn loh avangin Gareth Southgate-a hote tan hna harsa tur awmin a lang lo.
Flick-a Germany
Germany-in Euro zawhah Joachim Low an mangṭha a, Hansi Flick hnuaiah an khingpui an hneh vek avangin Qatar zin turin an tling tawh.
Europe ram zinga World Cup-a record nei ṭha ber Germany hian Euro 2020-ah beisei pha lo mah se Bayern Munich hlawhtlingpuitu Flick-a'n a enkawl tak avangin Qatar-ah champion rinkai zingah an tel pha ang.