Boruak vir velah ka buai lo - Verstappen

Formula 1 driver championship hmahruaitu Max Verstappen chuan thil tum fel tak a neih thu a sawi a, inelna pawn lamah chuan boruak vir vel tam viau mah se chungte chuan a tih buai loh thu a sawi.

Kum 24 mi Max hian season duhawm a hmang mek a, champion lai Lewis Hamilton chunga awmin table-ah hmahruaitu a ni. Vawi sarih champion tawh Hamilton tan record siam a tumna kawngah Dutch tlangval hi amah dal theitu tur a ni ang.

Red Bull driver Verstappen chuan, "Pawn lam aṭangin ka rilru lak pen tuma min beitu an tam, hengte hian min ti buai lem lo. Mi ṭhenkhat chuan vanneih vanga kaltluang laklawk ni ang tein min sawi, thil mak a ni hran lem lo.

"F1 inelna hmachhawn tur hian paltlang tur a tam, champion tura inel phak nih ve phei chu a hluin a ropui tawh viau," tiin a sawi a, tuna a thlen chin chu vanneih vang maia thleng ngawt a nih bik loh thu a sawi.

Inelna an neih leh hmabak chu Brazil-ah a ni dawn. Dutch tlangval chuan amah leh a team tan South America rama inelna neih chu tun hma lamah pawh an chet fuh tawhna ṭhin a nih thu a sawi a, kuminah pawh hlawhtlin nawn leh theih a beiseina a sang hle.