GSW tan Curry-a point 50 a tawk

Stephen Curry chuan nimin zing khan a thiam thil a lantir leh ta. American point guard hian point 50 a neih bakah assist vawi 10 nei bawkin Golden State Warriors chu Atlanta Hawks lakah 127-113 in hnehna a chanpui a, tun hnaiah a zawnin vawi nga an chakna a ni.

Hawks lam hian quarter hnihna an khelh lai chuan point 15 laiin hma an hruai fal, mahse quarter thumna bikah Warriors hian 41-20 ngawtin an vaw let a, hemi quarter bikah hian Curry chuan point 18 zet a nei hial.

GSW player zingah match khat chhunga point 50 bakah assist vawi 10 nei tling thei hi an la tam lo. Tun hmain Wilt Chamberlain leh Rick Barry te chuan an lo ti tawh a, tunah chuan NBA Most valuable Player vawi hnih ni tawh Curry hun a thleng ve leh ta chiah.

Nimin zing inkhel dangah Brooklyn Nets an chak lo. Tun hnuah Nets hi a zawnin vawi nga an chak tawh a, mahse DeMar DeRozan-a point 28 neih hmangin Chicago Bulls chuan Nets hi 118-95 8 in an hneh a ni.

Tun hnaia chesual khut ṭhin Los Angeles Lakers pawhin kawng dik an zawh ve leh ta. Lakers hian an khingpui Charlotte Hornets chu over time an khelh hnuah 126-123 in an hneh. Lakers thiampuipa Anthony Davis-a'n point 32 a neih zinga point ruk chu OT chhunga a neih a ni.

NBA Results
Philadelphia 76ers 96 - 103 New York Knicks
Chicago Bulls 118 - 95 Brooklyn Nets
Memphis Grizzlies 125 - 118 Minnesota Timberwolves (OT)
Dallas Mavericks 108 - 92 New Orleans Pelicans
Golden State Warriors 127 - 113 Atlanta Hawks
Denver Nuggets 113 - 96 Miami Heat
Sacramento Kings 104 - 109 Phoenix Suns
Los Angeles Lakers 126 - 123 Charlotte Hornets (OT)