Premier League-ah Gerrard a kir dawn?

Liverpool ṭantuten an ngainat em em Steven Gerrard chu Premier League-ah an hmu leh mai thei. Mahse, tun ṭumah erawh an hmu a nih pawhin Aston Villa Coach angin an hmu thung ang.

Dean Smith an ban hnuah Villa-in coach zawn hna an thawk chhunzawm zel a, Gerrard bakah hian Belgium coach Roberto Martinez, Denmark manager Kasper Hjulmand leh Southampton boss Ralph Hasenhuttl te hming sawi rik a ni.

Khawthlang media-ten an tarlan dan chuan Villa hian manager panga emaw paruk emaw tal inbiakna neihpui an duh a, a bik takin Gerrard emaw Martinez emaw thlem luh an duh chuan sum insen an huam a ngai ang.

Martinez hian Premier League-a kir a pawiti lo nia sawi a ni a, kum 2016 aṭanga Belgium enkawl tawh coach hi kum 10 liam ta khan Villa hian an lo dawr tawh.

Mahse, khatihlaia Villa neitu Randy Lerner dawrna chu hnarin a enkawl lai Wigan Athletic-a cham a thlang - tunah chance dang a nei leh ta.

Gerrard hi Villa CEO Christian Purslow nen ṭhianṭha tak an ni thung a, Purslow hian Liverpool-ah managing director hna a lo thawk tawh ṭhin a, heta ṭang hian Gerrard nen hian an inhre ṭha hle.

Denmark boss Kasper Hjulmand pawh lam rik a ni a, Villa sporting director leh Danish mi ve tho Johan Lange nen an inhrechiang hle - ani erawh an duhthlan hmasak zinga mi a ni lo.

Villa hian November 20 zanah Brighton & Hove Albion an mikhual dawn a, Villa thuneitute chuan league match an khelh leh hma hian coach neih hman ngei an duh.

Hetihlai hian Villa-in an duh ber nia lang Gerrard thlem lut tur hian tih tur a tam dawn. Kum 41 mi coach hian season hmasa khan Scottish Premiership-a Celtic rorelna chu titawpin Rangers a champion pui a, tun season-ah champion nawn thei dinhmunah an ding mek.

Rangers hian league match 13 an khelh tawhah point 30 neiin hma an hruai mek a, an hnuai chiaha awm Celtic hian khelh zat inangah point 26 an nei mek.

Liverpool-a Gerrard-a khelhpui ṭhin Jamie Carragher chuan, "Aston Villa-a kal hi Steven Gerrard tan chuan thil ṭha tak a ni thei. Mahse, Stevie hian season hmasa khan Celtic khumin league nomawi a chawi tawh a, tun season-ah chawi nawn thei dinhmunah a ding mek.

"Rangers-a season tawp thleng cham a, nomawi chawi leh a, league title pahnih nei chunga chhuah hi a thlang zawkin ka ring a ni," a ti a, chutihrual chuan Villa-in an ngamna zatin a hril thui viau tura ngaih a ni.

Gerrard hian Rangers-ah kum 2024 thleng cham turin contract a nei a, Gerrard hian Villa pan duh pawh ni se Premier League club hian Scottish club hnenah Liverpool legend lei chhuak turin sum ṭhahnem tak an pek chu a ngai ang.