Entu awm loa khelh kan pawm - PFA chief executive

Professional Footballers' Association deputy chief executive Bobby Barnes chuan season ṭan lehna tur a nih phawt chuan entu awm loa khelh an pawm thu a sawi.

England-ah coronavirus vangin April 30 thleng football chawlh a ni a, chutihrualin Football Association, Premier League leh English Football League te chuan season hman zawh ngei an duh. Barnes chuan, "Duthu-samah chuan mipui hmaa inkhelh ngei kan duh. Tunah erawh duh thlang thei kan ni lo a, kan inkhel thei te a nih chuan entu awm loa khelh pawh a ṭul dawn.

"Player-te pawhin thil awm dan an thlir a ṭul a, duh duh dana awm thei kan ni lo. Nitinin player-te ka bia a, entu awm loa khelh hreh awm mah se tunah chuan an rilru sukthlek an thlak. "Football player-ten hlawh an lak theihna chhan bulpui pakhat chu television a ni a, hei bakah hian an contract zah a ṭul bawk. PFA-in player-ten an hlawh an lak theihna tur a ni a, inkhelh theihna kawng a inhawng a nih chuan entu awm loa khelh kan pawm mai a ṭul a ni," tiin duh thlan theih dan a awm loh thu a sawi.

United Kingdom-ah nimin thleng khan Covid-19 vei thar mi 6,650 an awm a, mitthi 335 an awm tawh a, dam fel leh tawh mi 135 an awm. Premier League-in May thla tirah inkhel an ṭan thei ang ngei ang tih pawh rin a la harsa hle.

Liverpool-in point 25 in hma an hruai mek a, Premier League champion turin hun chauh an mamawh tawh a ni ber. Dutch defender Virgil van Dijk chuan Reds-in champion an nemnghet huna mipui an awm loh chuan pawi a tih tur thu a sawi.

Amaherawhchu, Van Dijk-a'n a ngaihdan a sawichhuah hun leh tunlai boruak a dang tawh a, player-te pawhin entu awm loa khelh an pawm ṭan tawh. Barnes chuan, "Season thar tibuai lo a, tun season zawh kan duh chuan zawh theih tur hrang hrang kan dap a ṭul a ni," tiin a sawi.