Ennawm ropui chu

Khawvela ennawm hmuh nawm ber ang hial an sawi FIFA World Cup kan nghak chhuak ta. Zanin dar 8:30 hian Luzhniki Stadium, Moscow-ah inelna thlengtu Russia leh Saudi Arabia ten match hmasa ber an khel ang.

Kumin World Cup hi Sony Ten 1, Ten 2 leh Ten 2 HD-ah a en theih dawn. Zanin dar 8:00 hian opening ceremony ṭan a ni ang a; dancers, gymnasts leh trampolinists - 500 velin Russian kaihhnawih an lantir ang a, halmawi nen a tawp hi khar a tur a ni.

Inelna thlengtu Russia tan hun ṭha
FIFA World Cup inlan tur zinga ranking hniam ber chu Russia an ni a, inelna thlengtu ni mah se knockout stage thleng lo tura ngaitu an tam hle. Amaherawhchu, Russia hi seeded an nih avangin team nem ber Saudi Arabia nen bul an ṭan dawn a, zanina point thum an hmu thei a nih chuan knockout stage kawng a inhawng zau sawt ang.

Group A-ah hian Russia leh Saudi Arabia bakah Uruguay leh Egypt te an awm a, team pahnih hian Zirtawpni zan dar 5:30-ah an khel thung dawn.

Hun ṭha chu
Russia hian nikum October thlaa South Korea an hneh hnuah match sarih chhung chak hmel an hmu tawh lo a, Saudi lam hian match thum hnuhnung pathum friendly match-ah an khingpui an hneh lo vek bawk.

Sbornaya (Russia hming lem) hian WC 2002 hnuah chak an la nei leh lo. USSR kehdarh hnuah World Cup vawi thum khel leh tawhin 1994, 2002 leh 2014-ah te khan group stage an paltlang lo a, an hneh chhun pawh African ram pahnih Cameroon (1994) leh Tunisia (2002) te an ni a. Match hnuhnung pangaah (D2 L3) chak an nei lo a, tun hi insiamṭhatna hun ṭha a ni.

Saudi pawhin record an nei ṭha bik lo a, WC 1994 hnuah chak hmel an la hmu lo a, match hnuhnung 10-ah vawi hnih an inhnehtawk tih loh chu an chak lo vek. Inelnaa an match hmasa berah chak (D1 L3) an la nei lo a, WC-a match 13 an khelh tawhah vawi khat chiah clean sheet-in hemi ṭum hian Belgium 1-0 in a hneh a, an khingpui ang thoin anni tan pawh insiamṭhatna hun a ni.

Engtin zel?
World Cup thlengtu zingah match hmasa bera chak lo an awm lo. Russia tan Saudi aia khelhpui tura thlanawm an awm chuang lo a, amaherawhchu October 1993-a an intawn tawh awmchhunah Saudi hi 4-2 in an chak.

Group A-ah Uruguay chu harsatna nei lo a tlang tura ngaih an ni a. Inelna thlengtu erawh Egypt ai pawhin rin an hlawh lo zawk. Hetihlai hian Russia coach hlui Fabio Capello chuan, "Draw kha ka thlir a, group stage an paltlang ka ring. Football hmasawnna atan sum an seng nasa a, result ṭha tak an neih ka beisei," tiin a rin thu a sawi ve thung.

World Cup history-ah inelna thlengtu South Africa chiahin group stage an paltlang lo a, Russia hian hniak tam zawk hnung zui an duh ang.

Chak kan duh takzet - Cherchesov
Russia coach Stanislav Cherchesov chuan, "Engvangin nge kan chak dawn kan tih chuan kan duh takzet vang a ni," tiin chak duhna thinlung an neih thu a sawi.

Kum 54 mi Cherchesov hnuaiah hian Russia-in result ṭha an nei tawk lo a, match 20 an khelhah vawi nga an chak a, vawi kua zet an chak lo. Amaherawhchu, Russia hi inelna lian thlengtu an nih avangin an tling nghal a, kum 2014-ah World Cup an khelh bawk avangin tawnhriat nei an awm nawk bawk.

Kum 33 mi midfielder Aleksandr Samedov chuan, "World Cup hnuhnung ber kha ka la hria a, khami ṭum khan chuan kan hlauthawng hle. Tunah erawh tawnhriat kan nei tawh a, engkim a dang tawh a, kan zauthau tawh lo," tiin an inpeih thu a sawi.

Russia coach Cherchesov pawhin, "Mi tupawhin an duh danin football chungchang an sawi a, mipui pawhin an ṭawmpui ṭhin. Amaherawhchu kan chungchang an sawi hi kan game hmasa ber a zawh chuan a danglam tawh ang," tiin a inrintawk hle.