Halep tluk thei an awm lo

Women's Tennis Association ranking chhuak thar berah Simon­a Halep chu hmahruaitu a nih chhunzawm zel a, French Open champion hian point 7970 hmuin, amah hnaih bertu Caroline Wozniacki chuan point 6745 a hmu thung.

Kum 26 mi Halep hian Sloane Stephens hnehin a vawi khat nan Grand Slam nomawi a chawi a, Romanian tennis player zingah inelna liana champion thei pa­thumna a ni. A coach Virginia Ruzici hian kum 40 liamta khan Paris-ah hlawhtlinna a lo chang tawh a, hun rei tak hnuah Halep hian a sulhnu a rawn chhui leh thei ta chiah a ni.

Russian nula Maria Sharapova chu a sang 20 zingah la tel phak chiah lo mah se, point 1943 hmuin 23-na dinhmun a luah ve leh ta. Grand Slam vawi nga champion tawh Sharapova hi thla 15 hrem a nih hnuah ranking nei loin a rawn kir a, season hnih chhungin hma a sawn chho leh tawh hle.

French Open aṭanga inhnuk­dawk Serena Williams pawh 183-naah a awm ve leh tawh. World number 1 hlui Serena hi fa neih hnua rawn kir hlim a ni a, grass court inelna lian Wimbledon-ah chuan inlan thei tura beisei a ni.