Japan tawh an khirh dawn!

World Cup khel tur Japan chuan Russia an pan hmaa an match hnuhnung berah team 'ṭha' an ni tih an pholang a, Paraguay chu 4-2 in an sawp.

Japan tan Shinji Kagawa chu player langsar a ni a, Borussia Dortmund attacking midfielder hian goal khat a khung bakah assist vawi hnih a nei bawk.

Poland-in World Cup-ah goal khung an harsat dawn lo tih an pholang ve bawk a, Lithuania chu 4-0 ngawtin an sawp - Robert Lewandowski chuan goal hnih a khung a, Bayern Munich striker hi Russia-ah pawh Poland innghahna tur a ni ang.

Japan an thiam
Austria-a inkhelah Paraguay-in goal an khung hmasa zawk a, World Cup khel lo tur ram tan hian Oscar Romero chuan minute 32-naah a khung - mahse Japan chhaih kawlhna goal mai a ni.

Japan hian chawlhlawk hnuah goal an khung ṭan a, Real Betis winger Takashi Inui chuan minute 51-na leh 63-naah goal hnih a rawn khung - Kagawa siamsak ve ve a ni. Russia-ah Manchester United player hlui Kagawa hi Japan innghahna tur a ni dawn.

Samurai Blue (Japan sawina) duh angin thil a thlen chhunzawm a, Paraguay forward Federico Santander chuan an lamah a ti lut a, Japan hmahruaina chu 3-1 a ni.

Hei le Kagawa
Paraguay beiseina chhi nung turin Richard Ortiz chuan minute 90-naah an si phurh rawn sut ṭhen ve leh mah se Japan-in Paraguay neih loh an nei a, a hming chu Kagawa a ni - kum 29 mi attacking midfielder hian ram tan match 92 a khelha a goal 30-na ni turin hun pek belhah chak nemnghehna goal a khung.

Japan hian June 19 zanah Colombia nen World Cup-a an match hmasa ber an khel dawn a, Senegal leh Poland te nena an awmhona group aṭangin Shinji Okazaki, Keisuke Honda, Maya Yoshida leh Yuto Nagatomo te telna team hian last 16 tal luh an beisei ang.

Hetihlai hian Paraguay goalkeeper Justo Villar chu minute 12-na lekah lakchhuah a ni a, kum 40 mi goalkeeper tan ram tana a match hnuhnung ber a ni - Paraguay tan match 120 khelin kum 2004 khan Paraguayan Footballer of the Year-ah thlan a lo ni tawh a, 2011-a Copa America final an luh ṭumin Best Goalkeeper-ah thlan a lo ni tawh bawk.

LewandoGOAL
Poland-in Lithuania laka hnehna chang turin harsatna an tawk lo a, minute 19-na aṭangin goal an khung ṭan - an goal hmasa ber hi captain Lewandowski khung a ni a, team movement mawi taka an pholan hnua lut a ni.

Kum 29 mi striker hian a la duhtawk mai lo, minute 32-naah freekick hmangin a goal hnihna a khung leh a, chawlhlawkah 2-0 a ni. Second half-ah Bayern Munich striker hi luhtir a ni tawh lo chungin Poland-in harsatna an tawh phah lo a, Dawid Kownacki leh Jakub Blaszczykowski ten goal khat ve ve khung ve lehin 4-0 in an chak.

Poland hi Japan te nen group khatah an awmho a, Russia-a an match hmasa ber hi June 19 zanah khelin Senegal an hmachhawn ang a, Colombia leh Japan an hmachhawn chhun­zawm ang.