Wolves tan Raul a khel dawn
Premier League inpetkai thar Wolverhampton Wanderers chuan Portuguese club Benfica aṭangin forward Raul Jimenez chu season khat chhung atan loan-in an hawh.
Mexico international Jimenez hi World Cup khel tura koh zingah a tel a, ram tan match 62 a inlanah goal 14 a khung thei. Kum 2015 khan Atletico Madrid aṭangin Benfica hi a pan a, Portuguese club tan hian match 120 a inlanah goal 30 a khung sak.
Mexican club ṭha Club America aṭanga bul ṭantu forward hian Benfica tan league nomawi pahnih bakah Portuguese Cup leh Portuguese League Cup a chawi tawh a, Mexico tan Olympic gold medal hlawh chhuak tawhin Mexican league-ah vawi hnih a champion tawh bawk - tawnhriat a nei ṭha hle.
Wolves hian Bournemouth aṭanga an lak ngheh hnu lawkah striker Benik Afobe chu Stoke City-ah loan-in an chhuah tir thung a, Championship club-ah hian thla ruk chhung loan-in a khel dawn a ni.