Johanna Konta-i'n bul ṭan fuh

Tennis grass court season an hmang ṭan a, inelna ngaihhlut Wim­bledon inbuatsaih nan tournament hrang hrang khelh mek niin, chung zinga pakhat Nottingham Open-ah British number 1 Johanna Konta chuan a match hmasa berah Kurumi Nara a hneh.

Thawhlehni zan inkhelah world number 22 Konta hian Japan nula Nara lakah 6-2, 6-3 a hnehna changin second round a inhlangkai. Konta hian season dang ang bawkin clay court-ah beisei a phak lo a, grass-ah erawh beiseina a nei sang thung. Season hmasa khan Wimbledon semifinal a khel phak a ni.

Inkhel dangah khawtual nula dang Heather Watson erawh a chak lo nghal. British number 2 hi American nula Danielle Lao lakah 6-1, 6-3 in a chak lo. Watson hian tun hnaiah beisei a phak lo, kar hmasa mai khan Surbiton Trophy-ah player langsar pawh ni lem lo Gabriella Taylor a ngam lo tawh bawk.

Katie Boulter erawhin 6-4 6-4 in Yanina Wickmayer a hneh a, Katie Swan pawh German nula Mona Barthel lakah beisei nei sang ve hman viau mah se 7-6 (7-5), 7-5 in a chak lo.