Arsenal inthuam ṭha zel dawn

Arsenal chuan an ṭhat tawk lohna lai thuam ṭhat an tum zel a, Sampdoria midfielder Lucas Torreira chu pound maktaduai 26.4 bawrin an lalut dawn. Uruguay international hi World Cup khel turin zin mek mah se a aiawh leh club lamin inbiakna an nei.

Kum 22 mi Torreira hi a contract neih laiah chuan pound maktaduai 21.9 a lei chhuah theih a ni. Mahse, season hmasa khan a khelh ṭhat avangin club lian dangin an ngaihven ve bawk, Serie A pahnihna Napoli chu duhtu langsar an ni. Premier League club Gunners hian Italian club khumin kum nga daih contract an ziahpui ang.

A tirah chuan Torreira hi striker a ni ṭhin. Italy a pan tirh pawhin hmatawng a ni. Mahse, coach Massimo Oddo-a'n midfield-ah a khelhtir a, a bik takin goal venhim kawngah defender a puih ṭhat ṭhin avangin a lar chhan pawh a ni. 2016 khan Sampdoria panin, season hmasa khan an rinrawl a ni a, Serie A defensive midfielder ṭha berte zingah a tel phak a ni.

Uruguay international hi player thawkrim tak a ni a, Sampdoria tana a khelh lai hian freekick pet thiam tak a nihzia a lantir fo. Arsenal manager thar Unai Emery hnuaia player thar pahnihna a ni. Tun thlatir khan Juventus defender Stephan Lichtsteiner chu free transfer-in an lalut tawh bawk a, July thla chhungin Borussia Dortmund defender Sokratis Papastathopoulus an lalut fel hman tura ngaih a ni bawk.