Ibra-a'n Sweden a ringtawk

Zlatan Ibrahimovic chuan World Cup khel dawn lo mah se Sweden chungah rinna a nghat ngam a, hnehna an chan theih nan ṭawiawm ngei a tum thu a sawi chhuak.

Kum 36 mi Ibrahimovic hian ram tana inkhelh a chawlhsan tawh a, Russia-ah inkhel ve dawn lo mah se football khawmpui lian ber hi a hmuna en ngei a tum.

Champion tura a rinte sawiin Ibra chuan, "Brazil, Spain, Germany leh Argentina te an ni a, chutihrualin Sweden pawh sawi bo theih a ni lo," tiin an ram a dah sang thiam hle.

Manchester United striker hlui hian tun hma lama a tih fo angin thu maksak a sawi chhuak tel. MSL club LA Galaxy tana khel a nih tawh avangin United States a ṭan thu a sawi bawk, "Ka tan chuan US hi chenna thar a ni tawh a, ka thlawp a ni. World Cup an khel lo tur erawh pawi ka ti," a ti.

An ram chungchang sawi zuiin Ibra chuan, "World Cup khel tur hian ram lian leh harsa tak tak an paltlang a, thil engkim mai hi a ngaihnawmin a hmuhnawm vek dawn. Hun pawimawh lai taka che fuhte an vannei dawn a ni," tiin a sawi.