T20 World Cup semifinal ; Pakistan khingpui tur Australia

Zanin dar 7:30 hian Dubai International Stadium-ah Pakistan leh Australia ten T20 World Cup semifinal an khel dawn. Shaheens hi T20 World Cup-ah kum 2009 khan an champion tawh a, Australia erawh 2010-a final an luh kha an thlen san ber a ni thung.

Tun ṭum inelnaah hian Pakistan hi an che ṭha takzet a, match nga an khelh tawhah hnehna an la chang vek. Australia hi England laka an tlawm tih loh chu an la chak vek a, inkhel hmuhnawm tak a beisei theih ang.

Head to head
Pakistan hi tun ṭum inelnaah record an nei ṭha zawk a, an intum tawhnaah pawh an record a la ṭha zawk cheu. Team pahnih hi T20 bikah vawi 23 an inhmachhawn tawh a, Shaheens hi vawi 13 chakin Aussies hi vawi kua an chak thung.

Team pahnih inhmachhawn hnuhnun ber chu November 2019 kha a ni a, Australia-in 2-0 in series an la. T20 World Cup-ah ṭum ruk an inhmachhawn tawh a, vawi thum ve ve an chak. Kum 2016 khan Aussies hian 21 runs-in Shaheens hi an hneh.

En châkawm
Dubai International Cricket Stadium-ah hian zanina inkhel tur ram pahnih hi an inlan hnuhnun berah an chak ve ve. Semifinal khel turin an inpeih a, squad an neih ṭhat ve ve avangin rinkai zawk an awm lo.

Aussies batter zingah David Warner-a'n Pakistan a ngam ber a, Shaheens lakah hian match 15-ah 348 runs siamin a strike rate pawh 135.93 a tling pha. Bowling lamah Mitchell Starc-a'n T20 bikah Pakistan lakah wicket 13 a la a, a chet ṭhat ber ṭumin 11 runs pein wicket thum a la.

Pakistan lamah captain Babar Azam-a'n Aussies lakah 278 runs a siam a, average pawh 69.50 runs tling phain half century ṭum li a siam. Babar Azam leh Mohammad Rizwan te hi tun inelna opener inkawp fuh ber anga chhal theih an ni a, bowler lamah Shaheen Afridi te an ho an awm bawk avangin Pakistan-in final luh an inbeisei khawp ang.

Probable XI
Australia: David Warner, Aaron Finch (captain), Mitchell Marsh, Glenn Maxwell, Steven Smith, Marcus Stoinis, Matthew Wad (wicket-keeper), Pat Cummins, Mitchell Starc, Adam Zampa, Josh Hazlewood.

Pakistan : Mohammad Rizwan (wicket-keeper), Babar Azam (captain), Fakhar Zaman, Mohammad Hafeez, Shoaib Malik, Asif Ali, Shadab Khan, Imad Wasim, Hasan Ali, Haris Rauf, Shaheen Afridi.