Duhthusam a thleng - Smith Rowe

Emile Smith Rowe chuan England tana kohna a dawng chu a duhthusam thleng dik a nih thu a sawi a, tun hma lama a nun dang phung ṭha tawk lo pawh a siamṭhat tawh thu a sawi lang tel bawk.

Arsenal midfielder hian season duhawm a hmang mek a, club tana a khelh ṭhat miau avangin England manager Gareth Southgate chuan a vawi khat nan a ko, match a khel ngei dawn em, tih la chiang lo mah se kohna dawn hi atan chanchin ṭha a ni.

Kum 21 mi Smith Rowe chuan, "Arsenal hian kalphung khawng leh khauh tak a nei, mahse ka ngaihsak ngai teh vak lo. Mahse, ka dik lo a ni tih ka hriat avangin tunah chuang kan hotute thusawi eng pawh ni se ka ngaithla ṭha em em vek.

"Ei leh in chung-changah pawh ka taksa tana ṭha lo tur, mahse ka ei châk zawng ni si ka insum lo ṭhin. Tui ka in tlem hle bawk, tunah chuan ka nunphung dik tawk lo laite ka siamṭha tawh," tiin a sawi a, inkhelh chauh ni loin khelmual pawn lam pawimawhna a hrechiang tawh.

Arsenal manager Mikel Arteta pawhin Smith Rowe hian a nunphung ṭha lo a kalsan thu a lo sawi tawh a, Spanish manager hian Arsenal midfielder nunphung ṭha lo kalsan hi a nihna tak sawi lo mah se ei leh in bakah thusawi a ngaihthla ṭha tawk lo hi a ni tih Smith Rowe zawkin a rawn sawi lang.

English midfielder hian a naupan lai sawi zuiin, "Kum 15 vel bawr ka nih lai khan Tottenham hian an hnena khel turin min duh tawh. Mahse, Arsenal ṭantu ka nih avangin ka ngaihsak lo, kum 10 mi ka nih laia ka zawm tawh Arsenal tana khelh hi ka duhthusam a ni zawk," tiin Tottenham Hotspur aia Gunners a thlan thu a sawi.