Boxing C'ship-ah professional a tel theih

Mizoram State Boxing Championship chu November 30 aṭanga December 3, 2021 chhungin Serchhip-ah neih a ni dawn. Mizoram boxing-a thuneitu sang ber Mizoram Boxing Association (MIZBA) chuan inelnaah hian professional boxer an tel theih tur thu an puang.

Boxing C'ship-ah hian senior (elite), junior (youth) leh sub junior category a awm dawn a, mipa leh hmeichhe hmangin category tin hi thliar a ni vek ang.

Mizoram Boxing Associa-tion chuan, "Covid-19 hri leng avangin boxer-ten inelna an hmachhawn thei lo a, an fitness leh performance nasa takin a tlakhniam phah. Boxer-ten hma an sawn theih nan inelna hi SOP zawm chungin buatsaih tum a ni," tiin boxing hmasawnna tur inelna buatsaih an nih thu a sawi.

Professional boxing chung-changah MIZBA chuan, "Tokyo Olympic-ah ram engemawzatin ram tana khel turin professional boxer-te an tir a, medal ṭhahnem tak an la nghe nghe. International Boxing Association (AIBA)-in amateur boxing inelnaah professional tel a phal tih a chiang a, Boxing Federation of India pawhin mahni awmna State Boxing Association phalna lain amateur huangah tel an remti," tiin thuchhuah a siam.

Chutihrualin MIZBA hian professional luhchilh turte chu inhriattir hmasa turin thuchhuah an siam a, inhriattir loa professional luhchilh turte pawh Mizoram State Boxing Championship-a an tel duh a nih chuan dilna an thehluh theih thu an thuchhuahah hian an tarlang.

Mizo zinga professional boxer hmasa ber chu Lalrinsanga Tlau a ni a, September 22, 2019 khan professional fight hmasa ber a hmachhawn. WBC youth champion Sangtea hi Dubai-ah a awm mek avangin inelnaah hian a tel thei dawn lo.

November 27 hian LPS Fight Night 2 a awm dawn a, heta inlan tur Mizo professional boxer NT Lalbiakkima (Siaha), Vanlalawmpuia (Khuangthing), Laldingliana (Tuipui), F Zoramchhana (Cherhlun), C Lalhruaitluanga (Mualpui), HC Lalramfela (Chawngtlai) leh H. Lalrinhlua (Hnahthial) te pawh an duh a nih chuan an inlan thei ang.