India T20 captain Rohit Sharma

Virat Kohli-a'n T20 World Cup zawhah T20 bika India tana captain hna a chawlhsan tur thu a sawi a, Men in Blue hi Rohit Sharma captain-na hnuaiah an khel ang.

BCCI chuan Thawh-lehni khan tun thlaa New Zealand-a hmachhawn tur player 16 awmna squad an puang a, T20 captain atan Rohit Sharma an nemnghet bawk.

Kum 34 mi Rohit Sharma hi khawvel batsman ṭha ber zinga mi a ni a, T20-ah India tan match 116 khel tawhin 3,038 runs a vaw chhuak. Rohit hian century pawh ṭum li siam tawhin half century pawh vawi 24 ngawt a siam tawh.

IPL-ah Rohit hi Mumbai Indians tan khelin kum 2013 aṭang khan captain hna a chelh a, a captain-na hnuaiah vawi nga ngawt an champion. T20 World Cup khelh zawh taka India captain Virat Kohli khan IPL-ah a club khelhna Royal Challengers Bangalore a la champion pui lo.

Men in Blue hian New Zealand nen T20 series match thum an khel ang a, match hmasa ber hi November 17 hian Jaipur, Rajasthan-ah khelh a ni ang.

KL Rahul chu vice captain atan ruat a ni a, hetihlai hian Virat Kohli, Jasprit Bumrah, Mohammed Shami, Hardik Pandya leh Ravindra Jadeja te chu T20 inkhel tur atan hian hahchawlhtir an ni thung.

India leh New Zealand te hian T20 match thum an khelh zawh hian Test match vawi thum an khel lehnghal dawn a, Test match khel tur squad an la puang lo.

India's T20I squad:
Rohit Sharma (Captain), KL Rahul (Vice-Captain), Ruturaj Gaikwad, Shreyas Iyer, Suryakumar Yadav, Rishabh Pant (wicket-keeper), Ishan Kishan (wicket-keeper), Venkatesh Iyer, Yuzvendra Chahal, R Ashwin, Axar Patel, Avesh Khan, Bhuvneshwar Kumar, Deepak Chahar, Harshal Patel, Mohammed Siraj.