Hmabak match hnih - Spain-in chak an mamawh ve ve!
International break-ah Spain-in match hnih khelh tur an nei a, point ruk an hmu zo lo a nih chuan World Cup 2022-ah Spain kan hmu lo mai thei!
Spain hian zanin dar 1:15-ah World Cup qualifier khel turin Greece an lenchilh dawn a, Pathianni zan dar 1:15-ah Sweden an mikhual dawn bawk - an group-ah pahnihna an ni mek.
Group B-ah Spain hian match ruk khelhah point 13 an nei mek a, hmahruaitu Sweden chu khelh zat inangah point hnihin an phak lo mek. World Cup khel lo thei dinhmunah an ding tihna a ni.
A tawi zawnga sawi chuan Spain-in chak ngei ngei an mamawh a, chutihrual chuan an hmabakah Sweden an la tel avangin an kutah engkim a innghat tiin a sawi theih.
Spain an ṭha lo?
UEFA Nations League final-a an tlawm hnua a vawi khat nan Spain an inlan dawn a, Greece khelmualah an leng dawn - pathumna Greece hian World Cup khelh beiseina an la neih ve tho avangin a awlsam dawn lo.
Chu chauh a ni lo. Spain hi Greece nen an intawn hmasakah an chak zo lo a, mualneitu, rin hlawh zawk ni chungin 1-1 in an inhnehtawkpui. Greece hian mahni mualah chuan lo hneh theih an inbeisei ang.
Luis Enrique-a tan chanchin lawmawm lo dang a awm a, an ṭhat dan berin an khel thei dawn lo. Forward ṭha ṭhiau Ansu Fati, Gerard Moreno, Yeremi Pino leh Mikel Oyarzabal te chu hliam vangin an inlan thei dawn lo.
Hetiang a nih chuan tlarhmaah Alvaro Morata chu rin tur a ni dawn a, Juventus striker hi Sporting Lisbon midfielder Pablo Sarabia leh RB Leipzig attacking midfielder Dani Olmo ten an thlawp thei ang.
Tlarhnung hi
Barcelona defender Eric Garcia a inhliam mek a, mahse, Spain-in tlarhnung laia inkawp turin Pau Torres leh Aymeric Laporte an neih tho avangin hei erawh lungngaihna tur a ni lo.
Enrique-a'n si ban nghak turin Athletic Bilbao keeper Unai Simón chungah rinna a nghat a, mahse, tun hnaiah David de Gea a chet ṭhat avangin Enrique tan buai dan ṭha chia buaina tur a awm.
Greece-in hrem vangin AZ Alkmaar centre back Pantelis Chatzidiakos leh captain Anastasios Bakasetas an chhawr thei dawn lo a, Bakasetas hi striker a nih avangin tlarhnung leh tlarhmaah buaina a awm dawn tihna a ni.
Tlarhnung laia khel turin Greece tana la inlan lo Dimitris Goutas chu a din mai a rinawm a, Turkish Süper Lig-a goal li khungtu defender din pui turin Liverpool full back Kostas Tsimikas chu a laiah khelhtir theih a ni bawk.
Sweden hi
Spain inkhel tur kan sawi laiin Sweden ngaihthah a thiang lo. Group B hmahruaitu hian zanin dar 10:30-ah Georgia an lenchilh dawn a, chak tura ngaih an ni.
Zaninah Sweden an chak chuan Spain tan Greece lakah tlawm a thiang lo - an tlawm chuan Sweden an tlang dawn chiang tihna a ni a, Enrique tan hei hi thlentir a rem lo a, khawvelin Spain tel lohna World Cup ngaihtuah a thiam lo ang!
Sweden hian tlarhmaah player ṭhang-duang, Real Sociedad forward Alexander Isak leh Juventus forward Dejan Kulusevski te an nei a, AC Milan forward Zlatan Ibrahimovic a lo kir leh tawh bawk.
Mahse, Sweden hian an neih ṭhat ber ber thawhchhuahpui lo pawhin Georgia hnehna tur khawp player chu an nei a, Spain nena an inkhel tur thlir chunga player an khek a nih pawhin a mak lo ang.