Portugal tan chetsual a thiang lo

Cristiano Ronaldo-a'n FIFA World Cup khelh ngei a tum a, amaherawhchu khawvela footballer ropui zinga mi hi Qatar-a inlan tur chuan Portugal an inpettlin hmasak a ṭul. Zanin dar 1:15 hian Dublin-ah Portugal-in Republic of Ireland an tlawh dawn a, Fernando Santos hote tan World Cup khel turin point hlawhchhuah ngei a ṭul.

An him lo
Europe-ah ram 55 a awm a, heng zing aṭang hian ram 13-in World Cup an khel dawn. Qualifier aṭang hian ram 10 an tling phawt dawn a, playoff hmangin hmunruak pathum hi ram 12-in an inchuh leh ang. Playoff aṭanga tling turin ṭum hnih chak a ngai a, knockout a nih dawn avangin vanduai theih a ni a, group hmahruaitu nichunga Qatar zin theihna ticket neih hi a awlsam ber chu a ni.

Ronaldo telna Portugal hi group A-ah pahnihna an ni mek a, amaherawhchu Serbia aia match khata an khelh tlem avangin an dinhmun erawh a la ṭha zawk. Fernando Santos hote hi Serbia aia an goal difference a ṭhat zawk avangin Republic of Ireland laka point khat an hlawh chhuak thei a ni chuan match tawp bera Serbia an hmachhawn hunah draw a tawk ang.

Chutihrualin Dublin-ah hian mualneitu hi an chak a nih chuan Portugal-in November 14, Pathianni zana Serbia an mikhual hunah chak ngei ngei a ṭul ang. A tawi zawng chuan Ronaldo hi World Cup-a inlan lo thei dinhmunah a la ding.

Inkhel tur chu
Portugal hian Ireland hi September thla tir khan an mualah 2-1 in an hneh tawh a, he inkhel hi Cristiano Ronaldo tan chanchin chhinchhiah tlak a ni. Manchester United forward hian first half-ah penalty a hlah a, mikhual team hian John Egan goal hmangin hun rei tak hma an hruai.

A tawpah player danglam bik Ronaldo a rawn lang a, minute 89-naah siphurh sutna goal a khung hnuin injury time-ah chakna goal a khung. Portugal captain hian an ram hnehna a chanpui a ni satliah lo a, mipa footballer zingah ram tana goal khung tam ber record a siam.

Euro 2016 champion Portugal hi Ronaldo chungah ringawt an innghat tawh lo a, player ṭha rual awm khawmna tihin an sawi theih. Manchester City player pathum Ruben Dias, Joao Cancelo leh Bernardo Silva te ringawt pawh hi inchhuanna tham a tling a, Premier League star dang Bruno Fernandes, Diogo Jota, Joao Moutinho leh Ruben Navas te bakah Joao Felix, Andre Silva, Renato Sanches leh Nuno Mendes te an awm a, an mamawh ang point an hlawh chhuak ngei turah a ngaih theih ang.