T20-ah Mizoram an chak ta

Board of Control for Cricket in India (BCCI) hnuaiah Cricket Association of Mizoram (CAM) chuan bung thar a kai ve zel. CAM senior team chuan BCCI hnuaia T20 inelna huangah a vawi khat nan hnehna an chang ve ta.

Syed Mushtaq Ali Trophy khelh laiah Thawhlehni tlai khan Mizoram chuan Manipur chu wicket riatin an hneh a, group stage paltlang zo lo mah se Mizoram cricket tan ni chhinchhiah thlak a nihna a bo chuang lo.

Mizoram senior team hian kumin chhungin inelna hma-chhawn tur pakhat an la nei. December 6 aṭangin Vijay Hazare Trophy khelh tur a awm leh dawn a, squad erawh a hrana puan tur a ni ang. Inelna hmachhawn turte chu November 30 aṭanga khung hran an ni leh ang.

Hnehna chu
Vijayawada, Andhra Pradesh-a inelna neihah Mizoram hi an group match hmasa paliah an chak lo. Chak ni hmel hmu loin an tluan mai dawn niin a lang hman, mahse match hnuhnung berah chak ni hmel an hmu ta hram.

Manipur lakah Mizoram tan hian Bobby Zothansanga chuan over li a vawm aṭangin wicket hnih a la a, run 11 chauh a pek bawk avangin a che ṭha hle. G. Lalbiakvela leh Remruatdika Ralte te chuan wicket hnih ve ve an la bawk.

Run siam lamah chuan tawnhriat nei ṭha Taruwar Kohli (38*) leh Uday Kaul (31) te an che fuh bawk a, tualchhung tlangval Lalhmangaiha leh Iqbal Abdullah te chuan 11 runs ve ve siamin hnehna an chan theih chhan a ni bawk.

Plate Group-ah Mizoram hi Vidarbha, Tripura, Meghalaya, Nagaland, Sikkim, Manipur leh Arunachal Pradesh te nen an awmkhawm. Match nga ṭheuh an khelh zawh hnuah Mizoram hian parukna dinhmun an luah, group hmahruaitu Vidarbha chu an tlang.

Hmasawnna
Khawvel huapin India hi cricket thiam berte zinga mi a ni a, state hrang hrangin an khel nasa - player ṭha leh thiam pawh an tam hle. Mizoram tan BCCI hnuaia inelna hmachhhawn hi thil awlsam a ni lo, chutih rualin zawimuangin hma an sawn ve zel.

Mizoram bowler Lalbiakvela chuan, "Senior team inelna ni mah se player naupang zawk kan nei nual, ṭum danga match kan khelh tawhte nena khaikhin pawhin hmasawnna hrang hrang kan nei," tiin CAM team in hma an sawn zel thu Vanglaini a hrilh.

Tun ṭum Syed Mushtaq Ali Trophy-ah hian Mizoram tan Bobby-a chu mimala langsar ber tih ngam a ni. Chaltlang tlangval hian inelna neih chhung khan wicket nga a la a, tualchhung player tan pawh kawng a inhawng tih lantirtu a ni.

Syed Mushtaq Ali Trophy hi T20 a nih avangin inelna dang aiin lawmman pawh a tlem hret. Player inlante hian match khatah Rs 20,000 zel an hlawh a, over 50 inelna huanga an hlawh ṭhin zatve zel an hlawh tihna a ni. Vijay Hazare Trophy-ah chuan match khatah Rs 40,000 zel an hlawh ang.