Football nunrawnna tuartu coach!
Premier League-ah match 11 chiah an la khel a, coach ban tawh zat i hre duh em? A chhanna chu panga tih a ni. Club 20 zinga club pangain coach an ban tawh tihna a ni a, heng coach-te tan chuan football lo liama 'nunrawng hmelṭha' an awm lo ang.
Tottenham Hotspur coach Nuno Espirito Santo, Norwich City boss Daniel Farke leh Aston Villa coach Dean Smith te chu November kar hmasa berah ban an ni a, hna nei loin an awm mek.
Season hmasa tluan aiin tun season-ah Premier League club-ten coach an ban hnem tawh zawk a, kum 17 chhunga league match 11 leka coach ban hnem ber season a ni ta bawk.
Covid-19 vanga fans an awm loh reng hnuah an lo kir a, sum leh pai harsatna avangin buaina a awm a, heng zawng zawng hian coach ban hi a tihluar ta niin a lang - coach tan season duhawm a ni lo.
Tel ve ta lote...
October 3 khan Watford chuan coach Xisco Munoz an ban a, tun season-a manager ban hmasak ber a ni. Hetihlai hian Hornets hi league match sarih aṭangin 14-na an ni a, Claudio Ranieri an lalut.
Saudi PIF-in pound maktaduai 305-a Newcastle United an lei khan coach an ban rinna a lian a, tun season-a chak la nei lo Steve Bruce chu October 3 khan banin a aiah Eddie Howe an lalut ta.
November kan chuang kai a, inban thu kan hre chho mawlh mawlh. Spurs-in an league match hnuhnung pasariha vawi nga an tlawm chhanah Nuno an puh a, November 1-ah an ban.
Ni tam a liam hman lo - November 6-ah Norwich-in tun season-a an chak hmasak ber an tawn hnuah Farke an ban a, a zawna league match nga an tlawm hnu, a tuk lawkah Villa-in Smith an ban zui.
Kan thupui ber inban!
Tun hnai season thum liam ta kan thlir chuan league match 11 hnua coach ban zat hi season khatah pakhat bak a ni lo - tun season-ah erawh panga a tling ta a, a san belh zel loh ang tih a sawi theih loh.
Premier League season khata man-ager ban hnem ber ṭum chu 2013-14 leh 2017-18 season kha a ni a, he season-ah hian coach 10 an ban. Tun season-a an inban dan pup pup en hian record khum theihna chance a awm!
Chutihrual chuan tun thlaa coach ban an tam chhan hi international break a awm vang a ni tel. Coach result ṭha lo leh kaltluang lo sa tan chuan international break hi a chimawm viauin a rinawm.
Mahse, club tan coach ban a, a thar lalut tura hun thawl an neih ṭhat lai a ni a, hei vang hian Premier League club pathumin tun thlaa an coach an ban hi an dinhmunte thlir tel chuan a awm lo hran lo.
A hlawk em?
Season laihawla coach ban hi club tam zawkin pumpelh an duh ve tho - coach tharin a hlawhtlinpui dawn leh dawn loh sawi lawk theih a ni lo a, coach thar rawih nan leh ban tak zângnadawmna pek tur atan sum tam tak insen a ngai bawk.
Mahse, table-a kan tarlan dan ang hian club tam takin coach ban hi a hlawkna an tel tlat a, hei vang hian he thil 'risk' sang tak hi an ngam leh mai ṭhin. Spurs-in Mauricio Pochettino an ban khan Jose Mourinho hnuaiah hmun riatin league table-ah hma an sawn tlat!
Everton-in Marco Silva an ban khan coach lailawk Duncan Ferguson hoin 18-na aṭangin 15-naah an chho a, coach tak tak Carlo Ancelotti awm hnuah 12-na ni chungin season an khar thei.
Chelsea-in club legend Frank Lampard chunga zahngaihna lantir loa Thomas Tuchel an lalut kha season laihawla manager lakluh fuh ber pawl a ni - top four an nih phah a, Champions League nomawi an chawi phah bawk!
Tifuh ve ta lote
Coach ban hrat anga club lar pakhat chu Watford an ni - 2019-20 season khan Javi Gracia, Quique Sanchez Flores leh Nigel Pearson an ban a, Pearson an ban hian match hnih khelh tur an la nei a, point thumin relegation zone chungah an awm bawk.
Mahse, coach lailawk Hayden Mullins hoin an hmabak match hnih an khel a, table-a 19-na ni chungin Championship lamah an relegate daih - an thlirlet apiangin tifuh an inti vak lo ang!
Tun season-ah pawh Hornets-in an coach Xisco an ban tawh a, tunah rih chuan an la tifuh chiah lo. Italian coach langsar Claudio Ranieri hnuaiah league match li khelin vawi thum an tlawm tawh.
Villa leh Norwich ten he thu buatsaih a nih thleng hian an coach thar turah thutlukna an la siam lo a, an tihfuh leh fuh loh chu season tawpah a hriat ang.
A har a ni
Premier League aṭanga tlaten tele-vision rights aṭanga an share ringawt an hloh tur hi a maktaduai tel tak meuh meuh a ni a, Premier League khel tur zawnga Championship playoff inkhel pawh hi hei vang hian khawvel infiamnaa sum inchuh tamna ber, tiin an sawi ṭhin.
Hei vang hian division hniam lama tlak thlak hi club tan chuan sum lama tlakchhiatna a ni tel nghal. Chu chauh a ni lo. Covid-19 vanga club-in sum an hloh a tam em em a, an sum dinhmun chhe lutuk siam ṭha tur chuan clu tan top flight football khelh chhunzawm zel a ṭul.
Season hmasa a tawp khan finance company Deloitte chuan European football-a club hausa zual 20 te dinhmun a zirchiang a, Covid-19 vanga season khat leka an sum hloh belhkhawm hi pound tluklehdingawn 1.7 a tling.
West Ham midfielder hlui Nigel Reo-Coker chuan, "Tun dinhmunah chuan sumin a nghawng theih tur ngaihtuah chungin thutlukna hi an siam ber zawk niin a lang," a ti a, club an demawm hran lo.
Fans vang!
Stadium-ah fan-te an kir leh ta a, fan-ten result-a an lungawi lohna langsar takin an tilang thei leh ta a, he 'pressure' avang hian club tam takin an coach an ban niin a lang bawk.
Season hmasa khan league match sarih zet chu chak nei loin Arsenal an kal a, mahse, coach Mikel Arteta-a'n a tawrh phah lo - tun season angin fans awm tawh se thawnthu erawh a danglam mai thei.
BBC football correspondent John Murray chuan, "Manager chelh hram hram a, chance pek duh fan-te hi a ngawi chawi an ni zawk tlat si a ni," a ti a, coach duh lohna thawm bengchheng nei zawkte ngaihthlak mai chu club tan a awlsam zawk thu a sawi.
Premier League club hrang hrang lo enkawl tawhtu Tony Pulis chuan fans piahlamah coach ban awlsam chhanah media a puh tel a, football pundit ṭhenkhat chuan an duhthawh mah mah ṭhina a hriat thu a sawi bawk.