Raducanu tan season a tawp

US Open champion hial ni mah se Emma Raducanu tan duhthusama season khar theih a ni bik lo. British tleirawl hian tun season bika a tournament hnuhnung ber atan Linz Open a khel a, a match hmasa berah Wang Xinyu a hneh lo.

Austria rama WTA 250 inelna neihah Raducanu hian seeded pawh chang phak lo Wang Xinyu chu 6-1 6-7 (0-7) 7-5 in a hneh lo, tun season atan bik inelna dang a hmachhawn dawn tawh loh avangin chak lo chungin kum a khar.

Inkhel a hautak a, set hnuhnung ber an khelh lai phei chuan Raducanu-i'n medical time out a la, a hliam enkawl lailawk a ngai hial. Inkhel chhunzawm leh thei mah se a duh ang result erawh a nei phak ta lo.

Kum 18 mi Raducanu chuan, "Inkhel harsa leh khirh tak chu a ni a, ka duh ang result nei chiah lo mah ila ka khelh danah chuan ka lawm," tiin a sawi a, ranking chhuak tharah number 20 a nih tak avangin season tharah chuan atan inelna hmachhawn a nuam sawt ang.

US Open champion a nih hnu lawkah Raducanu hi a coach nen an inṭhen a, coach nei loin tun thlengin a awm. Mahse, season thar aṭang chuan coach Torben Beltz nen an thawkdun dawn tih a sawi chiang bawk.

German coach Beltz hian tun hma pawhin Angelique Kerber a lo enkawl tawh, a kaihhruaina hnuaiah Kerber-i'n Grand Slam nomawi a chawi bakah world ranking lamah pawh a dinhmun a sang viau - Raducanu pawhin hlawhtlinna sang zawk chan a beisei ang.