European club final khelh hun sawn

Covid-19 chuan infiamna khawvelah nghawng a neih chhunzawm zel a, Europe-a football thuneitu sang ber UEFA chuan Champions League leh Europa League final khelh hun sawn a nih thu an puang. 

UEFA hian Hmeichhe Champions League final khelh hun pawh an sawn a, final khelh hun tur erawh chiang takin an la puangzar lo - mithiamte rawn chung zel leh Covid-19 dinhmun a zirin final hi la tih chian leh tur a ni. 

UEFA ruahmanna hmasa ang chuan Champions League final hi Istanbul khawpuiah May 30 khian khelh tur a ni a, Europa League final hi May 27-ah Gdansk, Poland-in a thlen tur a ni thung. 

Hmeichhe Champions League final hi May 24-a Vienna-in a thlen tura tih a ni a, mahse, Covid-19 in ziaawm lam a la pan theih rih tak lohah chuan UEFA hnuaia final pathum hi sawn a ni ta vek a ni. 

UEFA chuan thuchhuah siamin, "UEFA chuan May 2020-a club final khelh tur zawng zawng a sawn vek a, a hun leh ni tur erawh fel taka ruat theih a la ni lo. 

"Kar hmasa lawka European football-a thuneitute inrawnkhawmin an din, kan thil thleng mek ngaihtuahtu, UEFA president Aleksander Ceferin-a kaihhruai chuan kan kal zel dan tur an thlir ang a, thuthar kan neih thuai kan beisei," an ti. 

UEFA hian football fan-te nghahhlelh leh thlir chak European Championship chu nakkuma khelh tura an sawn a lo ṭul tawh a, club final sawn a ngaih leh tak avangin an lu a hai hle ang tih a chiang. 

Europe-a football thuneitu sang hian nikum khan lawmman leh TV revenue-ah ringawt Champions League-a inlan club-te chu euro tluklehdingawn 2.1 a sem a, sum chevel enin final sawn ringawt pawh hian nghawng a nei lian dawn tih a hriat. 

Champions League-a last 16 match pali chu second leg nen khelh zawh vek a ni tawh a, hetihlai hian match li dang erawh second leg khelh hmabak a la ni thung.

Europa League bikah chuan last 16 first leg hi match ruk khelh tawh a ni a, match hnih khelh hmabak a la awm thung - match khelh tawh sa te hi second leg an khelh leh ngei a rinawm a, hetihlai hian first leg pawh la khel lo Sevilla vs Roma leh Inter Milan vs Getafe hi ṭhum vawr hmanga khelhna hmun tur thlangin match khat khelhtir a nih a rinawm. 

UEFA hian Europa last 16-a first leg pawh la khel lo club pali hi match khat chauha a chingfel a nih chuan Champions League pawh a kang kai lo thei dawn lo a, quarterfinal chin hi match khata chinfel mai a nih a rinawm. 

Quarterfinal chin double leg-a khelh a nih loh chuan Champions League leh Europa League final khelhna tur ve ve Istanbul leh Gdansk te chuan inelna hi tournament khat angin an thlen maina chance a sang hle. 

Tuna UEFA tana buaina tur chu European league zawng zawng an chawl ṭhuap a, an khelh chhunzawm leh hun tur a in ang lo thluah hi a ni - mahni ram ṭheuha hri leng darh zel dan a zirin league khelh leh hun tur hi a chiang hlawm ang. Chutihrual chuan season danga league football zawh vek hnua final khelh ṭhin a nih ang khan Champions League leh Europa League final khelh kher a ngai dawn lo a, hei hian a chhawk zangkhai deuh chu a rinawm.