Spanish football chawlh chen tur hriat lo

Coronavirus-in zual lam a pan zel avangin Spanish football zawng zawng chu tiam chin awm loa chawlh puan a ni a, Spain sorkarin boruak a him tawh tih a chian hma loh chuan khelh chhunzawm a ni lo ang. 

March thlatir khan Spanish football-a league sang ber La Liga chuan round hnih chhung atan league an lo ti tawp tawh a, tunah erawh thuchhuah thar siamin tiamchin awm loin tihtawp lailawk a ni ta. Spanish La Liga-ah hian Barcelona chuan table chung ber luahin hmahruaitu an ni mek a, an hnuai chiahah hian point hniha hniam zawkin Real Madrid an awm. 

Royal Spanish Foot-ball Federation (RFEF) leh La Liga hnuaia Covid-19 zirchiang tura din commission chuan, "RFEF leh La Liga chuan Covid-19 um bo nana theihtawp chhuahtute a chhuang takzet a, he hrileng vanga harsatna tawkte kan tawrhpui takzet a ni," an ti. Spain hi Covid-19 in a tihbuai ber pawl a ni a, mi 33,000 chuangin he hri leng hi kai tawhin mi 2000 chuangin an thihpui tawh a ni.