T20 Cricket World Cup ; New Zealand-in England lakah phuba an la

Nilaini zan khan Sheikh Zayed Stadium-ah cricket inkhel hmuhnawm bik chhawpchhuah a ni a, T20 Cricket World Cup semifinal-ah New Zealand-in wicket ngain England an hneh. Black Caps hian 2019 World Cup final-a an hneh loh Three Lions laka phuba la chungin final an lut.

England-in an bat hmasa a, over 20-ah 166/4 runs an siam avangin chak turin an dinhmun a ṭha. Amaherawhchu New Zealand tan Daryl Mitchell a che ropui a, James Neesham-a'n rawn thlawp ṭha bawkin over 19-naah 167/5 runs siamin hnehna an chang.

T20 World Cup final hi November 14, Pathianni zan dar 7:30 hian Dubai International Stadium-ah khelh a ni dawn a, New Zealand hian nizana Pakistan leh Australia inkhela chak zawk an hmachhawn ang.

Three Lions ha-hum ri a ring
Ṭhumvawrah New Zealand an chak a, vawm hmasak an thlan avangin England-in an bat hmasa. Jason Roy inhliam vangin Jos Buttler (29) leh Jonny Bairstow (13) ten bul an ṭan a, an pahnih inkawp hian over ngaah 37 runs an siam hman avangin bul an ṭan ṭha lo.

Dinhmun ṭhaa England dahtu erawh Dawid Malan leh Moeen Ali te an ni a, Malan hian ball 30 lekah 41 runs a siam. Kum 34 mi Moeen Ali a che ṭha lehzual. English all rounder hian T20 World Cup hmain Test cricket a chawlhsan a, T20 leh ODI-a insawrbing a duh vang a ni.

Moeen Ali hian thi loin ball 37 lekah thi loin 51 runs a siam a, Liam Livingstone-a'n 17 runs rawn belh ve bawkin over 20-ah 166/4 runs an siam. England-in run an siam ṭhahnem a, New Zealand-in hnehna an chang a nih chuan target umpha sang ber an ni dawn. Chutihrualin dai a tlak tawh avangin batsman tan chance a ṭha a, mahse semifinal a nih avangin engmah a sawi lawk theih loh.

Beisei a chau
New Zealand hmabak a ko a, harsatna belhchhah turin opener Martin Guptill chu 4 runs chiah a siam tihin pavillion-ah a let a, captain ṭha mi Kane Williamson-a'n ball 11 zet hmachhawn mah se 5 runs bak a siam lo.

Black Caps-in wicket hnih an hloh hian 13 runs chauh an la siam a, Guptill leh Williamson te vawm hlumtu England bowler Chris Woakes a che ṭha hle. New Zealand tan chak turin thilmak a thlen a ngai.

Thilmak chu
New Zealand opener Mitchell-a'n fimkhur takin a khel a, beiseina nei chhunzawm turin wicket hloh a thiang tawh lo tih a hria. Mitchell leh Devon Conway te inkawpin 82 runs an siam a, heti chung hian England chu chak turin an dinhmun a ṭha zawk.

English bowler Liam Livingstone a rawn vul a, Conway chu 46 runs a siam tihin a vawm hlum a, Glenn Phillips pawhin 2 runs chauh a siam. New Zealand beisei a chauh lai takin James Neesham a rawn lut a, ani hi boruak thlak danglamtu chu a ni ta.

Over 17-naah England tan Chris Jordan-a'n rawn vawmin 23 runs tehmeuh a pe a, Neesham-a'n four vawi khat leh six vawi khat a vuaksak. Six runs a vuak hian Jonny Bairstow-a'n boundary line bulah dangin a vawm chhuak nghal a, Liam Livingstone-a'n a man.

Amaherawhchu Bairstow hian ball a vawm chhuah hmain boundary line a khawih fuh a, Neesham hi thi ta loin six runs a ni ta zawk a, inkhel ti danglamtuah a ngaih theih. Heti chung hian over thum la awmin Black Caps-in 133/4 runs an siam a, ball 18-ah 34 runs siam a la ngai cheu.

New Zealand ropuina hmuhin a awm a, English bowler Adil Rashid ball man tur Mitchell nen an insu buai. Black Caps hian run mamawh viau mah se infiammi rilru dik putu Mitchell-a'n tlan a tum lo a, inkhel dinhmun thlira run khat hlutna hriatthiam tan chuan Mitchell leh New Zealand fak mai lo chu tih theih dang a awm lo.

Neesham-a'n six a rawn vaw chhuak a, Mitchell pawhin a bat leh hmasak berah six bawk a rawn vua. Mahse over 18-na ball tawp berah Neesham a out a, New Zealand-in 147/5 runs an siam tawh chungin chesual ve thei an la ni. Ball 12 la awmah New Zealand-in 20 runs an la mamawh a, Mitchell-a'n six runs vawi hnih leh four vawi hnih a rawn vaw lehin 167/4 runs an siam a, over khat dah bangin hnehna an chang.

Eng nge an sawi?
England captain Eoin Morgan chuan, "Tumah ka dem thei lo, zanin chauh ni loin tun inelnaah hian kan khel ṭha em em a, theihtawp kan chhuah. New Zealand lakah erawh a tawp kan thleng thei ta lo a, over 17 thleng kha chuan chak tura dinhmun ṭha zawk kan la ni," tiin an chak loh chungin lawmna tur a awm thu a sawi.

Player of the match Daryl Mitchell chuan, "A tawpa thil thlen dan kha chu ka hre mumal lo. Over hnih khat kan chet ṭhat chuan kan vannei thei kan tih hri a, kan vanneih zar a tawp kan khar thei a ni," tiin a sawi a, New Zealand captain Kane Williamson pawhin Mitchell zara hnehna an chan thu a sawi.