Aston Villa coach thar Steven Gerrard

Premier League-ah Steven Gerrard a lo kir leh dawn ta a, Liverpool captain hlui hian Aston Villa coach ni tura sawmna chu lawm takin a pawm ta.

Rangers boss hian Scotland chhuahsanin Villa Park pan a remti a, kum thum leh a chanve chhung Villa enkawl turin contract a ziak a, league match nga a zawna a tlawm avanga ban tak Dean Smith hmun ruak a luah ang.

Gerrard hian Rangers-ah contract a neih mek avangin Villa hian an lei chhuak a, Captain Fantastic hming lem an pek ṭhin lalut tur hian Rangers hnenah pound maktaduai 4.5 an pe.

Kum 41 mi Gerrard chuan, "Aston Villa hi English football-a sulhnu nei lian leh club hlun tak an ni a, he club ka enkawl thei tur hi ka lawm hle a ni," tiin a club thar a zawm.

Sulhnu ropui
Gerrard hian Liverpool youth academy leh Under 18 tana coach hna a chelh hnuah kum 2018 khan coach puitling ni turin Rangers a pan a, season hmasa khan kum 10 hnua nomawi an chawi hmasak ber ni turin league-ah hneh loh nei loin a champion pui.

Tun season-ah pawh Rangers hian league match 13 an khelhah point 30 neiin hma an hruai mek a, an hnuai chiaha awm Celtic aiin point liin an sang zawk. Mahse, Gerrard-a'n Premier League-a chona hmachhawn turin a kalsan ta.

Gerrard chuan, "Club ropui tak enkawl tura hun ṭha min pek avang khan Rangers thuneitute chungah lawmthu ka sawi a, record siama league nomawi 55-na ka chawipui thei kha ka thinlungah hian a cham reng tawh ang. Player, staff leh club ṭantute an hma hun atan duhsakna sang ber ka hlan," tiin a club hlui a thlah.

Gerrard hi a assistant Tommy Culshaw, Gary McAllister, first-team coach Michael Beale leh head of performance Jordan Milsom ten an zui tura ngaih a ni a, hetihlai hian Smith-a hnuaia thawk ṭhin coach Aaron Danks, Austin MacPhee leh goalkeeping coach Neil Cutler te dinhmun tur erawh sawifiah thiam a harsa hle.

Hmabak leh chona
Gerrard-a'n player a nih laia goal a khung hnemna ber club chu Villa an ni a, vawi 27-a hmachhawnah vawi 13 goal a khung - tunah erawh hmachhawn nuam a tih em em club tan khan hna a thawk dawn ta.

England captain hlui Gerrard chuan, "Villa neitu Nassef Sawiris leh Wes Eden bakah club board-te nena kan titina aṭangin an club tan tum ropui tak an nei tih ka hria a, an hmachhawpte a hlawhtlin theih nana puih ka châk tawh hle," a ti.

Liverpool managing director hlui, tuna Villa chief executive Christian Purslow chuan, "Kan titi hona aṭangin Stevie-a hmachhawp, a thil duhte leh ngaih pawimawhte chu Villa nen a inmil hle tih kan hria a ni," a ti a, Liverpool academy-a bul a ṭan hnua Rangers a enkawl dan chu an ngaihsan thu a sawi bawk.

Gerrard hian a hna hmasa ber atan November 20 zanah Brighton & Hove Albion a mikhual dawn a, Crystal Palace, Manchester City leh Leicester City a hmachhawn hnuah December 11 khian Anfield-ah a kir dawn - hei hi a nghahhlelhawm takzet.