England hmaa ding tur Albania

England-in FIFA World Cup 2022 khel turin match hnih khelh hma bakah point li hmuh a la ngai a, zanin dar 1:15 hian Wembley Stadium-ah Albania an mikhual ang. Group I inkhel dangah Poland-in Andorra an hmachhawn dawn a, Hungary-in San Marino an mikhual bawk ang.

Gareth Southgate-a kaihhruai Three Lions hian 20 points an hmu tawh a, Robert Lewandowski telna Poland-in an chetsual an chang. Chutihrualin England hian an elpui ber Poland an hmachhawn dawn tawh lo a, match tawp berah San Marino an hmachawn dawn avangin hmabak a harsa tawh loah a ngaih theih.

England squad aṭangin hliam vangin Declan Rice, Marcus Rashford leh James Ward-Prowse te an inhnukdawk a, Mason Mount leh Luke Shaw te pawh inhliam vang thoin Albania hi an hmachhawn theih a rinawm loh.

Player hliam vangin Emile Smith Rowe an ko thar a, Arsenal rawlthar vang hian England inkhel tur en a châkawm sawt. Chutihrualin Three Lions dinhmun a him lo a, Albania lakah Southgate-a'n a rin ṭhinte bawk a rin a rinawm a, San Marino lakah Smith Rowe tan bul ṭan a beisei theih ang.

Arsenal keeper Aaron Ramsdale-a'n England number 1 nih inbeisei mah se Jordan Pickford bawkin bul a ṭan a rinawm a, Manchester United captain Harry Maguire pawh club tan che ṭha tawk lo mah se amah nek chhuak tur khawp an awm lo.

Midfield laia rinrawl Declan Rice avangin Liverpool captain Jordan Henderson-a'n bul a ṭan theih a rinawm a, Kalvin Phillips nen an inkawp thei ang. Goal nawr turin Jack Grealish, Raheem Sterling, Phil Foden leh Harry Kane te an awm thei a, Albania tan dan an harsa ang.